Македонските граѓани не им веруваат на попустите, но сакаат да се подноват. Така, во неделата на попустите за време на „Црн петок“, тие потрошиле повеќе од 9 милијарди денари или 150 милиони евра, покажуваат податоците што „Слободен печат“ ги доби од Управата за јавни приходи. Ова не се прецизни бројки за тоа колку пари поединечно се оставени за облека, обувки или бела техника, бидејќи од УЈП напоменуваат дека оваа сума е целокупниот готовински промет што е регистриран во малопродажбата од 25 до 31 ноември лани.

За разлика од другите европски земји, „Црн петок“ кај нас траеше цела недела, а во тој период рекламите на трговците ги повикуваа граѓаните да купуваат производи на попуст. Од Организацијата на потрошувачите на Македонија и годинава им оставија на граѓаните дали ќе купуваат на „Црн петок“ или, пак, ќе го избегнат. Попусти за време на оваа акција имаше и за купувањето преку интернет, а од ОПМ апелираа да се внимава од кого се купува.

– Ве информираме дека во периодот од 25.10. до 31.10.2024 година остварен е вкупен регистриран промет со ДДВ од малопродажба во висина од 9.006.027.768,00 денари (150 милиони евра). Во анализираниот период е опфатен целокупниот готовински промет што е регистриран преку фискалниот систем во малопродажбата, вклучително и маркети, супермаркети, бензински станици, продавници за облека, продавници за домаќинство, угостителски објекти, аптеки итн. – прецизираат од УЈП.

Во изминативе години граѓаните биле поскржави, па според прометот евидентиран преку системот на УЈП, од пред четири години, покажаа дека потрошените 37,7 милиони евра во 2020 година за време на тој викенд, биле помалку отколку во 2019 или 2018 година.

Во меѓувреме, од 25 декември лани до 25 јануари годинава траат законските зимски распродажби. Граѓаните треба да знаат дека и додека траат попустите, на производите може да има само две етикети со цена – односно со онаа највисоката или онаа на која се снижува. Ваквото прецизирање е со цел да се избегнат претходните практики, на лажно етикетирање со кое демек на граѓаните им се става до знаење колку „заштедиле“ со тоа што купиле стока на намаление.

Со новиот закон се предвидуваат и казни до 10.000 евра за нечесните, измамничките и агресивните трговски практики, со цел да се спречи и нелојалната конкуренција и профитерство на грбот на потрошувачите.
За да им се објасни што може да очекуваат, Државниот пазарен инспекторат изготви брошура со насоки, нудејќи поедноставено објаснување на новиот Закон за заштита на потрошувачите.

– Промотивна продажба е на нови производи, која се спроведува во рок не подолг од 8 дена, а акциска продажба е намалување на цена на ограничен број производи, која се спроведува во рок не подолг од 30 дена – посочуваат од ДПИ.

Меѓу другото, флаерот нуди објаснување дека трговците мора јасно и видливо да ја означат грешката на понудениот оштетен производ, а оние производи на кои им изминува рокот, а се со пониски цени, мора да бидат јасно истакнати. Инаку, распродажба на производи е дозволена само ако трговецот престанува со работа, се сели во друг дуќан, престанува да нуди одредена стока или врши реновирање.