Луѓето кои допрва ќе се раѓаат, ќе имаат подобар живот од нивните родители, вели Бил Гејтс
Милијардерот и филантроп Бил Гејтс неодамна изјави дека е оптимист за иднината на човештвото, и покрај многуте предизвици со кои тоа се соочува. Тој верува дека сите луѓе што ќе се родат во следните две до шест децении, ќе имаат подобар живот од луѓето родени во кој било период од историјата досега.
Препорачано
„Сè уште сум оптимист дека е подобро да се родиш 20-40 години од сега, 60 години од сега отколку во кое било време во минатото“, изјави Гејтс пред три дена на Институтот „Лови“ во Сиднеј, Австралија.
Гејтс потсети дека можат да се забележат многу обесхрабрувачки трендови, како несоодветниот одговор на пандемијата на коронавирусот, неисполнувањето на целите во борбата против климатските промени и растечките политички поделби во Соединетите Американски Држави.
Истражувањето на агенцијата за истражување на јавното мислење „Галуп“ во октомври покажа дека 42 отсто од Американците веруваат оти младите ќе имаат подобар животен стандард од нивните родители. Ова е за 19 отсто помалку отколку во 2019 година, кога беше спроведено истражување за истото прашање. Сепак, Гејтс, кој е коосновач на технолошкиот гигант „Мајкрософт“, верува дека песимистите ја немаат целосната слика.
Тој укажа на напредокот во здравството, истакнувајќи дека глобалната стапка на смртност на децата до пет години е преполовена во последните две децении.
„Бројот на иновации за подобрување на општата човечка состојба ќе продолжи да биде драматичен. Ќе ја излечиме дебелината, ракот, ќе ја искорениме детската парализа“, рече Гејтс. Тој го пофали потенцијалот на евтина и ефикасна зелена енергија, како и технолошкиот напредок што овозможува образовните и здравствените системи да имаат глобално влијание.
Тој рече дека работите се подобруваат. „Погледнете ги работите и кажете: „Добро, каде бевме пред 300 години?“, рече тој, додавајќи дека животниот век значително се зголемил во последните три века. Просечниот животен век во 1700 година бил 40 години, а во САД денес е 76,1 година.
„Без разлика дали сте биле крал или сиромашен, сте биле подложни на висока смртност кај новороденчињата и ниска писменост. Така, иновациите со текот на времето се феноменална приказна“, заклучил мултимилијардерот.
