Патувањето со воз станува сè попопуларно, а Европа е зафатена од бран на нови линии во јавниот превоз. Железниците никогаш не изгледале подобро, иднината изгледа светла, затоа што секој ден читаме за отворање на нови линии меѓу метрополите на стариот континент. Во морето на овие вести пристигна една интересна вест од Австрија или пак, можеби е подобро да се каже – бизарна, пишува „Пун куфер“.

Доколку се одлучите да патувате со воз во Австрија, а сте еден од оние кои сакаат да заштедат пари, постои многу конкретно решение. Одлуката можеби нема да е најлесната, но ако сакате да се возите бесплатно една година и да ги погледнете планинските врвови и пасиштата, единственото нешто што треба да направите ​​е да добиете тетоважа.

Можеби понудата звучи привлечно, но има и еден услов – треба да го истетовирате името на патничката карта „Клима тикет“ („KlimaTicket“). Единственото нешто што не е дефинирано е каде да се истетовирате, па можеби и вреди да се патува една година доколку тетоважата е на незабележливо место.

Промоцијата е лансирана ова лето, преку пренослив салон за тетовирање, кој посетуваше различни фестивали. Иако многумина тоа го дочекаа со потсмев, некои решија да го понудат своето тело за рекламирање, во замена за бесплатен билет, а според последните податоци такви лица има вкупно шест.

Самата промоција и идеја ја поддржа австриската министерка за климатски промени, Леоне Гевеслер, која присуствуваше на фестивалот носејќи лажна тетоважа со името на билетот.

Реакциите на иницијативата, беа поделени – некои сметаа дека е одлична идеја за подигнување на свеста кон животната средина, додека други сметаа дека е претерано да се нудат такви „бенефиции“.

Инаку, „Клима тикет“ („KlimaTicket“) првпат беше воведен пред две години, со цел да се промовираат возовите како одржлив начин на движење низ земјата.