Биографијата на германскиот филозоф и прозен писател Фридрих Ниче е добро позната и често пишувана. Но, тоа што единствено не се знае многу за него се неговите љубовни авантури кои, доколку ги имал, остануваат мистерија. Во овој текст се свртуваме токму кон неговата љубовна мистериозност.

Познато е дека Ниче никогаш не се женел, а во своите дела за жените пишува речиси со потценување, зборува и дека се нежни и скапоцени, но опасни играчки, дека се предодредени за домаќински работи, а не за јавни професии.

Сепак во 1882 година тој доживува една голема и несреќна љубов. Вечерата кај госпоѓа Мелвид фон Мајзенбург, прочуена по новите сервирани специјалитети, веројатно засекогаш ќе остане горчлива за него. И на непцето и во душата.

Уживајќи во вкусниот „специјалитет Мајзенбург“, на прагот се појавил задоцнетиот гостин, 20-годишната писателка Лу Саломе. Запознавајќи го популарниот писател кој тогаш имал 38 години, со воодушевување и почитување таа зборувала за неговите дела кои не ѝ биле непознати.

Според биографите, Ниче таа ноќ останал освоен и опиен од љубовта.

Иако подоцна му посветила две песни, „Болка“ и „Молитва на животот“, среќата започната на пролет згаснала со есента. На големиот филозоф, љубовта од Лу не му била возвратена.

Есента, Лу му соопштила дека се восхитува на неговиот дух и ум, но дека срцето и припаѓа на друг(и).

Очаен, Ниче три пати неуспешно се обидел да изврши самоубиство со големи дози на седативни лекови и апчиња против главоболки.

Со текот на времето (како што секогаш бива), болката од невозвратената љубов полека стивнувала и тој сосема се посветил на пишувањето. До крајот на животот ниту една друга жена не успеала да му го земе вниманието, колку што е познато.

Во едно сочувано писмо, адресирано до госпоѓа Мајзенбург, година подоцна, Ниче пишува – „Ќе дојдам во среда навечер, но Ве молам, никогаш повеќе немојте да ме послужите со оној, за мене, кобен „специјалитет Мајзенург“.

Сепак,  убаво е да ја препрочитаме (или набавиме) книгата „Ниче“ од Лу Саломе, преведена и уредена од Сигфрид Мендл (достапна е на „амазон“ по цена од 13,57 долари). Вреди за секој долар.