Во вторник (18 јули) од 17.00 часот на стадионот „Билјанини извори“ во Охрид ќе се игра реваншот од првото квалификациско коло во Лигата на шампионите помеѓу Струга Трим Лум и Жалгирис.

На првиот меч во Литванија македонскиот фудбалски шампион извлече поволен резултат (0:0) и има шанса пред своите навивачи да обезбеди пласман во втората квалификациска рунда каде што чека турскиот клуб Галатасарај.

Стружани објавија дека билетите на возвратниот дуел се распродадени и играчите на тренерот Шпетим Дуро ќе имаат голема поддршка.

Стратегот на нашиот првак уште еднаш му го дава епитетот фаворит на противничката екипа, но силно верува во својот тим и во позитивен резултат за пласман во следната фаза.

– На првиот натпревар имавме добар настап, и резултатот исто така беше прифатлив. Имавме можност да направиме нешто повеќе, но има два натпревари за играње, па фокусот е на утрешниот меч. Сè е отворено, стадионот ќе биде полн и ја очекуваме поддршката – рече Дуро на прес-конференцијата.

Нема доза еуфорија кај неговите играчи, само сериозност и максимална концентрација.

– Како тим не „летаме“ премногу, дури сме многу скромни од сите аспекти, и во однос на првите луѓе на клубот, стручниот штаб и фудбалерите. Знаеме дека противникот има несекојдневно искуство во европските натпревари, но добро ги знаеме фудбалерите, кои оваа недела ги исполнуваат задачите. Овој натпревар е друга приказна, кој треба да се одигра, и да се извлече максимумот – вели Дуро.

Жалгирис има 20 пати поголем буџет од Струга Трим Лум, но првите 90 минути од двомечот покажаа дека нема многу разлика на теренот.

– Кажав и пред првиот натпревар, дека Жалгирис по многу фактори е фаворит против нас, поискусни, со буџет 20 пати поголем од Струга. Тоа се докажа и во текот на минатата сезона, со пласманот во групната фаза од Конференциската лига, елиминирање на екипи како Малме, Балкани, итн. Но, реков во фудбалот, особено првиот натпревар покажа дека нема многу разлика на теренот – се зборовите на Дуро.