42-годишен жител на хрватската област Славонија доби кривична пријава за наметливо однесување и закани кон поранешната сопруга – според обвинението, тој за девет месеци лани, од јануари до октомври, повеќе од 6.000 пати ѝ се јавил на жената, а ѝ испратил и преку 11.000 СМС-пораки, јавија локалните медиуми.

Во бројните пораки, од кои испраќал во просек по 40 на ден, тој ѝ изјавувал љубов на бившата сопруга, ја повикувал да се врати кај него и да живее заедно со децата како семејство, но ѝ ја навредувал, ја пцуел, велел дека не се грижи за децата и ѝ се заканувал дека ќе ги убие нејзе и децата.

Осомничениот наметлив поранешен сопруг секојдневно одел кај жената на работа и набљудувал со кого таа се дружи и разговара, ја следел во автомобилот кога излегувала од работа, а од повисоките згради со двоглед го набљудувал дворот од куќата во која живее. Тој упорно и подолг временски период ја демнел жената и се обидувал да воспостави несакан контакт со неа, при што ѝ предизвикал вознемиреност и страв за нејзината безбедност, велат обвинителите.

Лани во септември, обвинетиот рано наутро се јавил по телефон кајнеговата малолетна ќерка и, веројатно за да ја исплаши поранешната сопруга, ѝ кажал „сите ќе ве убијам на спиење“, се вели во обвинението.

Осомничениот на распитот изјавил дека не следел никого, а пораките ги праќал неговиот син, со оглед на тоа што мобилниот телефон им бил заеднички. Рече дека само заради децата ѝ се јавувал на поранешната сопруга, а таа доаѓала кај него да зајми пари.

Оштетената им потврдила на истражителите дека нејзиниот поранешен сопруг сторил сѐ што е наведено во обвинението, а се плашела од него затоа што повеќепати и рекол дека доколку поради неа заврши во затвор, ќе се врати од затвор и дека „само ќе види што ќе ѝ направи“.

Во случајот се очекува пресуда.