Тежок удар за Њукасл во период со згуснат распоред.

Тренерот на Њукасл, Еди Хау, потврди дека дефанзивецот Валентино Ливраменто ќе отсуствува од терените најмалку осум недели поради повреда на лигаментите.

„Отиде кај специјалист, скенирањето првично изгледаше подобро отколку што мислевме. Но, експертот потврди дека станува збор за повреда која бара опоравување од два месеци, што е голем удар за нас со оглед на бројот на натпревари кои не очекуваат. Тоа е повреда на лигаменти и ќе биде потребно време за закрепнување“, изјави Хау.

Ливраменто се повреди на 28 септември против Арсенал во Премиер лигата, кога мораше да биде изнесен на носилки. Поради тоа ги пропушти дуелите против Унион Сен Жилуаз во Лигата на шампионите и против Бредфорд во Лига купот. Сите претходни натпревари сезонава ги започна како стартер.

Минатата сезона одигра 45 натпревари за Њукасл, а во ноември дебитираше за сениорската репрезентација на Англија, со која веќе има три настапи, вклучувајќи го и мечот против Србија, кога одигра сите 90 минути.

Њукасл моментално е на 15. позиција во Премиер лигата со шест бодови по шест кола, додека по две одиграни рунди во Лигата на шампионите има три бода и е на 11. место.