Израелската армија и разузнавачката агенција Шин Бет денеска објавија дека Ахмад Фавзи Мухамед Вадија, командант на бригадата Нукба на Хамас и неговите седум соборци биле убиени во израелски воздушен напад.

Во соопштението се потсетува дека Ахмад Фаузи Мухамед Вадија го предводел нападот на Хамас на југот на Израел на 7 октомври 2023 година, на параглајдер, пренесува „Тајмс оф Израел“.

Израелскиот дневен весник наведува дека Вадија бил особено познат како терорист кој пиел сок во семејната куќа на Гил Тас, кој беше убиен пред очите на неговите деца.

Израелската армија соопшти дека во воздушниот напад загинале уште седум членови на баталјонот Дарај Туфах на Хамас, од кои еден бил вклучен во набавка на бомби кои палестинската милитантна група ги користела за да ја пробие безбедносната бариера во Газа на 7 октомври 2023 година.

Израелскиот воздушен напад се случи пред болница, а армијата соопшти дека се преземени мерки за да се минимизира штетата на цивилите.