Лидерите на коалицијата „Вреди“, меѓу кои и Изет Меџити и Биљал Касами, вечерва на отворањето на централниот штаб за локалните избори на скопскиот плоштад „Скендербег“ се обратија пред членовите и симпатизерите, уверувајќи ги дека ќе победат на претстојните локални избори.

Настанот, со кој „Вреди“ практично ја започнува кампањата за изборите закажани за октомври, помина под силно полициско обезбедување. Тој беше пренесуван во живо на „Фејсбук“, а Меџити и сите други говорници од владејачката коалиција зборуваа на бина на која беа истакнати знамињата на Албанија, САД, ЕУ и НАТО, како и македонското државно знаме, кое беше поставено на крајот и во едночасовниот пренос во живо речиси и да не беше прикажано.

Централниот дел од бината, на кој настапуваа говорниците, беше резервиран за знамињата на Албанија, САД, ЕУ и НАТО – што на настан како вечерашниот сигурно не е случајно и ги потврдува двете главни теми кои ќе доминираат во кампањата за локалните избори во политичкиот блок на македонските Албанци. Првата е евроатлантскиот курс на државата, каде за очекување се многу убедување за тоа која од двете страни најдоследно го држи „европскиот пат“ на државата. Но, иако се работи за локални избори, ако се суди по говорите на вечерашниот митинг на „Вреди“, но и по препукувањата со ДУИ и „Европскиот фронт“ изминативе недели и месеци, централната тема на нивното предизборно соочување пред гласачите сепак ќе го содржи неизбежниот „етнички“ наратив – двете страни најмногу ќе се фалат себеси, ќе ги напаѓаат противниците и ќе се натпреваруваат за тоа кој повеќе „направил за Албанците“.

„И со десет партии против нас, победуваме затоа што „Вреди“. На претходните избори имаа против нас четири заедници и девет партии. Денес со Таравари се 10, но ние повторно победуваме“, рече Меџити во говорот.

Тој додаде дека коалицијата „Вреди“ досега „направила повеќе за унапредување на положбата на Албанците отколку што било сторено во последните две децении“, а искажа и серија остри критики кон ДУИ, обвинувајќи ја дека се обединила за скандали и корупција, наместо за албанскиот јазик и за унапредување на положбата на Албанците во државата – за што, според него, се обединиле партиите од „Вреди“.