Лични предмети кои некогаш ѝ припаѓале на легендарната комичарка Бети Вајт, вклучително и златниот часовник на нејзината мајка, ќе се најдат на аукција во септември.

Награди, слики, сценарија, накит и облека носена на црвениот тепих на актерката се изложени во аукциската куќа „Julien`s Auctions“ во Беверли Хилс.  Вајт почина на 99-годишна возраст на 31 декември минатата година.

„Ова е аукција која претставува еден неверојатен живот и кариера. Тоа е аукција на животниот стил“, рече Мартин Нолан, извршен директор на „Julien’s Auctions“. „Сите овие предмети дојдоа од нејзиниот дом во Брентвуд или од нејзината резиденција во Кармел, Северна Калифорнија, каде што живееше со нејзиниот сопруг Ален Ладен“, додаде тој.

Најличен предмет, според Нолан, е „часовникот на Бети од 14 каратно злато кој го добила на 25 декември 1940 година со иницијали „TCW“, што е, се разбира, Тес Вајт, мајката на Бети“.

Вајт ја започна својата кариера во радио во доцните 1930-ти, а во 1939 година го имаше своето телевизиско деби. Во 1952 година, Вајт имаше своја телевизиска серија „Life with Elizabeth“ и продолжи со култни улоги во шоуто на „The Mary Tyler Moore Show“ и „Golden Girls“.

Таа беше една од првите луѓе кои добија ѕвезда на Булеварот на славните во 1960 година. Помалата реплика, која се доделува на примачот кога ќе му биде доделена ѕвездата, ќе биде ставена на аукција како и бројните слики со животински мотиви и слики кои се дело на животни.

„Домашните миленици беа нејзина работа. Таа еднаш рече дека ја сака својата работа во шоу-бизнисот за да може да ја поддржува нејзината работа со животните“, рече Нолан.

Нолан ја проценува целата колекција од 1 до 2 милиони долари. Аукцијата ќе се одржи во септември во Беверли Хилс.