Целосна реконструкција на човечки остатоци пронајдени во гроб стар 4.000 години во Сибир ни го открива ликот на древен воин во оклоп, со оружје во рацете и штит од животински коски – сведоштво за живот исполнет со битки и издржливост, пишува „Лајв саенс“.

Оваа фасцинантна реконструкција ја прикажува физичката појава, вооружувањето и заштитата на воин од каменото доба кој живеел на истокот од Сибир, на подрачјето Кердуген – околу 140 километри оддалечено од Јакутск, во Руската Република Саха. Гробот бил откриен и ископан уште во 2004 година, но реконструкцијата започнала дури во 2023 година.

Остатоците биле пронајдени близу до површината, заедно со неколку врвови од стрели, доказ дека некогаш поседувал лак кој со текот на времето се распаднал, и голем штит составен од плочи од животински коски. Радиојаглеродната анализа покажала дека гробот е стар околу 4.000 години.

Истражувањата откриле дека воинот бил висок околу 165 сантиметри и починал на возраст меѓу 40 и 50 години, што за тоа време значело длабока старост. Неговиот череп покажува етничка поврзаност со домородните народи на сибирскиот арктички регион, а зараснатите рани на неговите коски сведочат за живот исполнет со борби, најверојатно како ловец или воин.

Со помош на фотограметрија, техника што комбинира стотици дигитални снимки за создавање тродимензионален модел, истражувачите ја реконструирале неговата глава. Штитот, кој исто така бил обновен, е направен од коскени плочи, веројатно од лос, споени со кожа. Во него биле пронајдени и остатоци од забодени врвови на стрели, што укажува дека успешно го користел како заштита во борба. Дополнително, во гробот биле пронајдени и делови од коски на уште едно лице, што може да упатува на древна човечка жртва – дел од ритуалот на погребување во тоа време.

Реконструираниот модел денес е изложен во археолошкиот музеј на Универзитетот во Јакутск.