Министерството за култура веднаш да реагира и да ја заштити Старата чаршија како симбол на Скопје од понатамошно деградирање и да реагира на непочитување на законот и подзаконските акти. Ова го побара Левица откако пред неколку дена градоначалникот на Општина Чаир, Висар Ганиу, свечено ја промовираше Портата помеѓу Бит Пазар и Стара чаршија, како проект на урбаниот и културен идентитет на Скопје.

Самоволието на ДУИ и натаму продолжува. Минатата недела, градоначалниот на општина Чаир, Висар Ганиу, помпезно промовираше уништување на заштитено културно наследство во Старата скопска чаршија, односно „поврзувачката порта на Бит-пазар со Старата скопска чаршија”, како што ја нарекоа од Општина Чаир. Во таа прилика Ганиу за медиумите арогантно изјави дека за оваа порта има одлука од Советот на Општина Чаир и не е потребна дозвола од Конзерваторски центар – велат од Левица.

Оттаму потсетуваат дека и директорката на Конзерваторскиот центар – Скопје, Љиљана Китановска, потврди дека портата е бесправна градба, која никако не може да биде легализирана и дека треба да се преземат сите законски мерки за итно нејзино отстранување. Исто така од Конзерваторски центар побараа и кривично санкционирање на одговорните лица за бесправното градење.

Дел од градбата се наоѓа во границите на контактната зона наречена Дуќанџик кој што се наоѓа во границите на споменичната целина Стара скопска чаршија и каде се применува режимот на заштита од прв степен, кој подразбира забрана за поставување градби на јавни простори и за нарушување на интегритетот на заштитената целина. Воедно, во важечкиот детален урбанистички план „Стара чаршија”, донесен во 1999 година со одлука на Советот на Општина Центар, не предвидува никаква градба на предметната локација. Ова значи дека поврзувачката порта поставена меѓу Бит-пазар и Старата чаршија го намалува културниот идентитет и уникатниот карактер на чаршијата, и според тоа веднаш треба да се отстрани – посочуваат од партијата.

Левица апелира Министерството за култура, веднаш да реагира и да ја заштити чаршијата како симбол на Скопје од понатамошно деградирање и да реагира на непочитување на законот и подзаконските акти, а од коалицијата ДПМНЕ/ЗНАМ бараате да се покрене кривична одговорност за непочитување на законите и уништување на културното наследство.