Летната турнеја на претставата „Добри луѓе“ на театар „Златен Елец“ опфаќа повеќе градови кај нас и во регионот
Претставата „Добри луѓе“ според текст на Данкан Мекмилан во режија и адаптација на Тамара Стојаноска, а во продукција на независниот театар „Златен Елец“, од 2 август, од Крушево тргна на турнеја низ државата и во Босна и Херцеговина. Претставата во Крушево беше изведена во рамки на програмата на манифестацијата „Десет дена Крушевска република“.
Препорачано
Во дуодрамата „Добри луѓе“ играат Филип Христовски и Тијана Трајчевска, музиката е на Ива Дамјановски, дизајнот на рекламниот материјал е на Бојана Цилевска, а продуцент е актерот Бобан Алексоски.
На 3 август претставата имаше изведба и на Меѓународниот театарски фестивал „Без рамка“ во Демир Капија, во Домот на култура „Мирка Гинова“. Театар „Златен Елец“ третпат учествува на овој ревијален фестивал, претходно со наградуваната „Кенди“ во режија на Тамара Стојаноска и „Дневникот на лудиот 3: Куќа на духови“ во режија на Ѓорѓи Ризески.
На 9-ти август претставата ќе се игра во Радовиш на летната сцена, а на 10-ти август пред Костурницата во Велес, во рамки на програмата „Велешко лето 2025“.
Потоа, на 27-ми август, претставата ќе се игра на планината „Плачковица“ во близина на Штип, во Планинарскиот дом „Вртешка“ на ВИА „Вртешка“.
На 30-ти август претставата „Добри луѓе“ ќе го затвори ревијалниот фестивал „Позориште без граница“ во Тузла, Босна и Херцеговина.
Независниот театар „Златен Елец“ уште од 2020 година со сите претстави патува низ државата, но и надвор од неа.
– Се трудиме секое лето да правиме мала турнеја, како што лани тоа беше со претставата „Кенди“ и „Пингвинот“ во режија на Тамара Стојаноска, претходно со претставата „Грета“, монодрамите „Дневникот на лудиот“, Надица Петрова со стендап-настапите, со детските претстави, со другите претстави што сме ги работеле – вели Бобан Алексоски, актер и продуцент во „Златен Елец“.
Инаку, годинава претставата „Добри луѓе“ се играше во Драмски театар на неделата на независна сцена, во Младинскиот културен центар на фестивалот „Скопско лето“ и во „БИТЕФ Театар“ во Белград, Република Србија, а премиерата се случи во ноември 2023 година.
Од септември независниот театар „Златен Елец“ новата 2025/2026 сезона ја започнува со три нови големи проекти, a ќе режираат Тамара Стојаноска и Мирко Радоњиќ од Црна Гора.
