Грчкиот бизнисмен Аристотел Оназис си изградил јахта „по своја мера“, и тогаш бродот за прв пат стана статусен симбол. Милијардерот заедно со меѓународниот џет-сет одлично се забавуваше на јахтата „Кристина О.“, а денес овој култен брод се продава за 90 милиони долари (околу 82,5 милиони евра).

Јахтата на Аристотел Оназис беше неговата гордост

Првично изградена како противподморничка фрегата за Кралската канадска морнарица во 1943 година, „Кристина О“ Оназис ја купил во 1954 година. Потрошил четири милиони долари за да ја претвори во луксузна суперјахта во бродоградилиштето HDW во Кил.

Бродот го добил името по неговата сакана ќерка Кристина. Оназис на јахтата бил домаќин на ѕвезди и членови на кралското семејство, како Џон Ф. Кенеди, и неговата сопруга Џеки, принцот Рение од Монако, Грејс Кели, оперската дива Марија Калас, која му беше долгогодишна партнерка во турбулентната врска, Елизабет Тејлор и нејзиниот сопруг Ричард Бартон, Џон Вејн, Грета Гарбо, Френк Синатра и други.

Џеки Кенеди, по атентатот на Кенеди, станувајќи вдовица, се омажила за Оназис и тоа на јахтата „Кристина О.“ Хајди Клум и Том Каулиц исто така го избраа бродот на Оназис за нивната свадба од соништата во 2019 година на Капри. Со цени кои почнуваат од 700.000 евра неделно за наем, дефинитивно нивната венчавка не била евтина.

На јахтата беа снимени и некои сцени за „Круна 5“, серија што беше објавена на Нетфликс во 2022 година.

Луксуз со мала доза на невкус

Во легендарниот бродски бар се уживало во бројни коктели и пијалаци. Но, не недостасуваат ни бизарни детали: резбите од коски од китови на шанкот прикажуваат некои порнографски сцени од „Одисеја“ на Хомер. Уште полудо: навлаките на столиците на шанкот наводно се сошиени од кожичката на половиот орган на кит.

Базенот покриен со мозаик може да се трансформира во подиум за танцување, а внатрешноста е дизајнирана во стилот на „англиска селска куќа“.

Во вкупно 17 кабини можат да се сместат до 34 гости, а импресивната трпезариска маса може да прими 24 луѓе истовремено. Секако, на јахтата има и фитнес студио и џакузи. За посетителите се достапни и детска игротека и спа центар.

Оназис го започнал трендот на суперјахти, стекнувајќи репутација како оригинален џетсетер, но по неговата смрт во 1975 година, „Кристина О“ малку падна во заборав. Сепак, јахтата е реставрирана неколку пати низ годините, а денес се наоѓа во Ница, чекајќи нов сопственик.