Легендарната гитара на која свирел Ерик Клептон додека ја компонирал неговата позната балада „Wonderful Tonight“ следниот месец ќе биде понудена на аукција во Лондон.

Во соопштението на аукциската куќа се наведува дека гитарата ќе биде понудена со карактеристичното оштетување од цигарите кои Клептон ги ставал меѓу жиците на вратот на гитарата, пренесува „Ројтерс“.

Овој легендарен британски гитарист ја купил гитарата во средината на 1970-тите, објави аукциската куќа „Бохамс“.

„Тој ја искористил таа гитара за да компонира неколку песни, вклучувајќи го и хитот од 1977 година за моделот Пети Бојд. Според приказната, Клептон ја напишал песната ‘Wonderful Tonight’ додека ја чекал Пети Бојд да се подготви за забава”, соопшти аукциската куќа „Бонамс“.

Акустичната гитара „Martin 000-28“ од 1974 година има и налепница на страната на која пишува „Таа е вљубена во човек за родео“ (She’s in Love with a Rodeo Man), алудирајќи на хитот на кантри-музичката ѕвезда Дон Вилијамс.

Клептон ја продаде гитарата на хуманитарна аукција во 1999 година, а на 12 јуни повторно ќе биде понудена на аукцијата „Рок, поп и филм“ во Лондон, со првична проценка од 300.000 до 400.000 фунти (349 на 465 илјади евра).