Ѕвездата на стариот Холивуд, Грета Гарбо, до денес остана неодгатнат холивудски мит. Нејзините современици оддалеку ѝ се восхитувале, како да е редок, скапоцен камен, чиј (скриен) живот надвор од сетот може да послужи како шаблон за ретко видена телевизиска серија. Не го сакала холивудскиот гламур и нејзината слава, не одговарала на писмата на обожавателите, ретко потпишувала автограми, а во далечната 1954 година не дошла ниту да го прифати почесниот Оскар за незаборавни филмски изведби и тоа без збор за објаснување. И покрај тоа, во текот на нејзината кариера, па дури и години откако се пензионираше на 36-годишна возраст и по снимени само 28 филмови, ја следеше титулата божествена Гарбо, сè до нејзината смрт на 15 април 1990 година во Њујорк.

Филмската икона од времето кога Холивуд почнуваше да станува филмска престолнина е родена во 1905 година. Пораснала во Стокхолм, во семејството на Ана Ловиса, работничка во фабрика за џем, и Карл Густафсон, чистач на улици и трговец, како трето и најмало дете.

Семејството и го дало прекарот Ката затоа што кога била мала погрешно го изговарала своето име. Од раното детство била многу повлечена и тивка. Но, го сакала театарот.
Познато е и дека поради сиромаштија го напуштила училиштето на 13-годишна возраст, но читала сè што ќе најдела. Бидејќи нејзиниот татко му подлегнал на шпанскиот грип кога таа наполнила четиринаесет години, таа морала да работи напорно. Започнала како работничка во берберница, а потоа била примена за чирак во стоковна куќа во Стокхолм, во одделот за шешири. Неколку години подоцна, Грета станала модел во каталозите и рекламите за шешири за луксузната стоковна куќа „Нордиска компанијает“. Така во 1920 година ја забележал Ерик А. Петшлер, еден од шведските филмски пионери и и дал улога во комедијата „Петар скитникот“.
Потоа, Грета Гарбо заминала во Њујорк, чекајќи покана за тест снимка од студиото МГМ. Се покажало дека камерата ја обожава. Нејзиниот нов ментор Ирвинг Талберг се погрижил Грета да ги исполни барањата на МГМ. Требало да го научи јазикот, да ослабе и да си ги поправи забите. Кога го направила сето тоа, студиото и ги наменило улогите на „вамп жена“.

Се испоставило дека убавината и нескротливата личност на Грета се неодолива комбинација за филмскиот заводник Џон Гилберт. Тој се заљубил во неа, а благодарение на вистинската хемија меѓу нив преточена во љубовните сцени, улогата на фаталната убавица Фелиситас, која заведува дури тројца мажи во филмот, е оценета како „најеротичната изведба која Холивуд ја видел“.

До крајот на снимањето на филмот што ја лансираше меѓу ѕвездите, Џон Гилберт и Грета Гарбо почнале да живеат заедно. Тие снимија уште три слични проекти бидејќи нивните љубовни сцени биле сензационални. Гилберт и помогнал да ги развие актерските способности, ја научил да се однесува како ѕвезда, да се дружи со други познати актери на забавите, да преговара за хонорарите со шефовите. Наскоро таа станала најсветлата ѕвезда на индустријата. Лудо заљубениот Џон Гилберт ја молел неколку пати да се омажи за него, сè додека таа конечно не се согласила, а потоа ја раскинала свршувачката и му го скршила срцето.

„Бев заљубена во него. Но, се плашев дека ќе ми кажува што да правам и дека ќе ми шефува“, објаснила таа подоцна.

Подоцна била во врска со американско-британскиот диригент Леополд Стоковски, додека сликарот Сесил Битон во своите мемоари се пофалил со кратка врска од една година.

Во 1941 година решила да ја напушти филмската индустрија по снимањето на последниот проект „Жена со две лица“, кој не бил прифатен од критичарите. За сите кои се обидувале да ја убедат да се предомисли, таа имала краток одговор: „Доволно направив“.

Гарбо никогаш не се омажила, немала деца и живеела сама поголемиот дел од животот, но сепак тоа не значи дека немала афери.

Од писмата внимателно чувани од нејзините пријатели заедно со приватен албум, продадени во 2017 година на аукција на Сотби со почетна цена од 20.000 фунти, се покажало дека нејзиниот живот бил тажен, осамен и депресивен, пишува The Guardian.

„Скоро секогаш сум сама, осамена и зборувам сама со себе. Возам до плажата каде што шетам и тоа секогаш ме развеселува. Но тоа е единственото нешто што ме прави среќна…“, напишала таа.

Писмата ги анализирал Габриел Хитон, книжевен експерт од Сотби.

„Во тие писма може да почувствувате речиси неподнослива тага и осаменост. Невообичаено е што ниту едно од писмата не е потпишано – на едно напишала „кловн“ наместо потпис, а неколку од нив имаат цртеж на жена на дното. Нејзината желба да остане во сенка, далеку од вниманието на јавноста, е силно нагласена. Имате чувство дека тука нешто не е во ред.“, изјави тој за Гардијан.

Денеска се верува дека легендарната актерка освен мажите, подеднакво ги сакала и жените, но тоа морала да го крие поради конзервативната средина. Се шпекулираше дека била во врска со американската писателка и драматург, Мерцедес де Акоста. Наводно била несреќно вљубена во колешка од драмското училиште, шведската актерка Мими Полак, пишува The ​​Guardian.