Лајчак: Српски Електросевер потпиша енергетски договор со косовскиот КЕДС

Мирослав Лајчак/ Фото: EPA-EFE/NEMANJA JOVANOVIC

Специјалниот пратеник на Европската Унија за дијалог меѓу Косово и Србија, Мирослав Лајчак, соопшти денеска дека српската компанија „Електросевер“ потпишала комерцијален договор за енергетика со компанијата за дистрибуција на електрична енергија на Косово (КЕДС), јави дописникот на МИА од Белград.

-Ова е важен чекор кон имплементација на Патоказот за енергетика и кон нормализација на односите меѓу Косово и Србија, напиша Лајчак на социјалната мрежа Х.

Тој не наведе каде и кога е потпишан споменатиот договор.

„Електросевер“ е во сопственост на енергетското претпријатие на Србија – Јавното претпријатие „Електропривреда Србија“ (ЕПС), но е регистрирано во Косово според косовските закони.

Во 2013 година, Косово и Србија, во рамките на дијалогот со посредство на Европската унија, постигнаа договор за енергетика, кој има за цел да го регулира прашањето за снабдување и наплата на електрична енергија во четири општини на север, каде живее мнозинско српско население.

Но, овој договор не беше спроведен и во јуни 2022 година страните постигнаа договор за имплементација на постојниот енергетски договор преку “Патоказот за енергетика“.

Но, ниту овој Патоказ не беше имплементиран, а ЕУ во текот на минатата година призна дека има доцнења во неговата имплементација, нагласувајќи дека конечната одговорност за имплементација на водичот е на Косово и Србија.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот