Американскиот продуцент, композитор и текстописец Квинси Џонс беше погребан на приватна церемонија во Лос Анџелес. Тој беше погребан во кругот на семејството точно една недела по неговата смрт, но се планира и поголемо јавно збогување со американската музичка легенда.

Семејството на музичкиот гигнат за агенцијата „АП“ изјавиле дека „на интимната церемонија присуствувале неговите седум деца, неговиот брат, двете сестри и членовите на потесното семејство“.

Семејството, сепак, не сака да открие на кои гробишта во Лос Анџелес е погребан Џонс. Тие уште еднаш изразиле „огромна благодарност до сите пријатели и фанови низ светот кои им испратиле сочувство и му оддале почит на Квинси Џонс“.

Напоменале и дека деталите за големото јавно збогување со Џонс ќе бидат објавени подоцна.

Инаку Квинси Џонс почина, опкружен со семејството, во својот дом во Бел Ер на 3 ноември. Имаше 91 година. Импресивната кариера на американскиот музичар, роден во 1933 година во Чикаго, траеше повеќе од 75 години. Речиси немаше награда со која Џонс не беше крунисан за време на неговиот живот. Меѓу другото, тој беше лауреат на дури 28 награди Греми, а магазинот „Тајм“ го прогласи за еден од највлијателните џез-музичари на 20 век.

Кариерата ја започна како џез-музичар, соработувајќи со Лајонел Хемптон и Чарли Паркер, потпиша музика за филмови и ТВ серии, а неговата соработка со Френк Синатра беше долготрајна.

Тој е најпознат како продуцент на три од најуспешните албуми на Мајкл Џексон, вклучувајќи го и оној кој сè уште е најпродаваниот албум на сите времиња, 42 години по објавувањето – „Thriller“.

Почина легендарниот музички продуцент Квинси Џонс