Кошаркарските репрезентации на Словенија и на Србија се наоѓаат на чекор до обезбедување пласман на Олимписките игри во Токио, откако на квалификациските турнири обезбедија пласман во финалето.
На турнирот кој се игра во Каунас, селекцијата на Словенија предводена од Лука Дончиќ со убедливи 98:70 ја совладаа Венецуела во полуфиналето.
Словенечките кошаркари од првата до последната минута имаа предност која се зголемуваше за на полувреме да изнесува седум поени. Натпреварот беше решен во третата четвртина во која Венецуела постигна само 14 поени, по што Словенија направи предност од 16 поени (71:55), а на крајот предноста се зголеми на 28 поени. Мајк Тоби со 27 поени и 12 скокови беше најефикасен во селекцијата на Словенија каде Дончиќ постигна 23 поени и 13 асистенции, додека кај Венецуела најдобри беа Карера и Курио со по 16 поени. За место на ОИ во Токио, Словенија ќе игра со подобриот од дуелот Литванија – Полска.

На турнирот кој се игра во Белград, репрезентацијата на Србија по двете неубедливи победи, во полуфиналето го совлада Порторико со 102:84, но притоа доминираше на теренот.
Првата четвртина помина во израмнета игра (28:26), а работите во своите раце српските кошаркари ги презедоа во втората која ја добија со 23:14 и на одмор заминаа со двоцифрена предност. Во второто полувреме, единствена неизвесност беше со колкава предност Србија ќе ја оствари победата. На крајот, избраниците на селекторот Игор Кокошков славеа со 102:84 и си закажаа финална пресметка со Италија за пласман на Игрите во Токио. Василије Мициќ со 21 поен и 8 осум асистенции беше прво име во победата во Сртвија, а добра партија одиграа и Бјелица кој даде 18 и Анѓушиќ со 15 поени. Кај Порторико се истакнаа Пинеиро со 23 поени и Кондит со 20 постигнати поени.Претходно, селекцијата на Италија со 79:59 ја победи Доминиканска Република.

Големо изненадување се случи на турнирот кој се игра во Сплит каде домаќинот Хрватска остана без Олимписки игри. Хрватите во полуфиналето загубија од Германија со 86:76 во полуфиналето. Германија во финалето на турнирот во Сплит ќе игра против Бразил кој го декласира Мексико со 102:74.