Македонскиот ракометен шампион Еурофарм Пелистер утре вечер ја започнува својата нова сезона во Лигата на шампионите, и тоа на домашен терен против хрватскиот великан ППД Загреб. Натпреварот во салата „Боро Чурлевски“ во Битола ќе започне во 20:45 часот, а тимот е подготвен и целосно мотивиран за овој голем предизвик.

Капитенот на битолчани, Филип Кузмановски, во пресрет на мечот изрази оптимизам и задоволство што тимот влегува во дуелот без кадровски проблеми.

„Среќен сум што ќе го пречкаме Загреб со најдобриот состав. Имавме неколку повредени ракометари кои изостанаа за пријателските натпревари и Суперкупот. Сега сите сме спремни и ќе го пречекаме Загреб. Лигата на шампионите сама по себе е голем мотив и ние ја заслуживме по ланската сезона. Максимално сме мотивирани, знам дека ќе имаме помош од нашите навивачи и очекувам полна сала. Максимално се подготвуваме и го респектираме Загреб. Не треба да зборуваме за историјата на Загреб, мотивирани сме и сакаме со позитивен резултат да ја почнеме Лигата на шампионите. Загреб има искусни ракометари. Со Игор Карачиќ добија многу во нападот. Тој ќе ги спои бековите, искусен е, поминал многу и знае како се игра на Балканот. Сигурно ќе биде мотивиран заради неговото минато со Вардар, клуб со кој ја освои Лигата на шампионите. Сепак, нашиот фокус е на нашата игра, нашата одбрана. Мислам дека сезонава ќе бидеме многу посилни, засилувањата добро се вклопија и изградивме добар систем. Имаме позитивна атмосфера и мислам дека тоа ќе биде клучот за наш успех во среда“, изјави Кузмановски.

Гарабаја: Подготвен сум утре да ја почувствувам атмосферата во Битола, Загреб е конкурентен тим