Граѓаните кои купиле станови во новата зграда во Маџир Маало, на улица Преспанска, и кои иако е измината повеќе од една година од рокот за завршување на изградбата, сѐ уште не можат да се вселат во становите, велат дека ќе го тужат инвеститорот затоа што со лажни потписи ги пренел струјомерите на име на новите сопственици.

Тие броила треба да бидат на име на изведувачот до моментот на вселување. Но, ние откривме дека 29 станови се пренесени со фалсификуван потпис на сопствениците. На состанокот на станарите утврдивме дека ниту еден нема потпишано таква согласност. Поради тоа бевме и на состанок во ЕВН и раководните лица со кои разговаравме велат дека ова не се случило никогаш порано, со лажни потписи да се врши пренос на броила – велат купувачите на станови во оваа зграда, кои се обратија во „Слободен печат“.

Како што тврдат, инвеститорот „Декон-ком“ направил изјава за согласност, на секоја изјава ставил преддоговор, барање за пренос со лажен потпис и таквите документи ги поднел во ЕВН. Откако станарите реагирале, како што велат, од ЕВН почнале да вршат враќање на броилата на име на инвеститорот.

 Овде се работи за две кривични дела – злоупотреба на лични податоцџи и фалсификување документ. Така што, ние собираме документи и подготвени сме да поднесеме пријава во Јавното обвинителство за да се разреши целата ситуација – велат идните станарите.

Тие објаснуваат дека немаат никаков контакт со директорот на „Декон-ком“ и дека не доаѓа на состаноци со сопствениците на становите кога го повикуваат, со изговор дека договореното време не му одговара. Како што тврдат, од нив не е побарано да потпишат согласност за пренос на броилата затоа што знаел дека нема да се согласат да плаќаат за улично осветлување и за пренос на струја за стан што не можат да го користат.

Неодамна од фирмата-инвеститор за „Слободен печат“ одговорија дека електричните броила се префрлени на име на купувачите во редовна процедура предвидена во ЕВН, при што некои од купувачите самите побарале да се спроведе ваквата процедура, односно сметките да се префрлат на нивно име. Оттаму сметаат дека не е направена никаква повреда на правата, туку напротив, дека се гарантира поголема сигурност за купувачот, како иден сопственик на станот. Но, не објаснија како се префрлени броилата без согласност и потпис од купувачите на становите.

Причината зошто ги менува броилата е за да докаже дека ни го дал владението. Нему му е битно да го докаже владението на наше име за да може да извади имотни листови, а имотните листови му се битни за да може да ги наплати оние 10 отсто што дел од станарите според договор уште не му ги имаат платено – договорот беше 90 отсто плаќање веднаш, а 10 отсто со имотен лист. Мислиме дека сака да нѐ изигра, набрзина да ни ги даде имотните листови и парното да не го направи. Од една страна да ни наплати 150 илјади евра што му ги должиме, а тој да го избегне трошокот за парно – велат идните станари на зградата.

Тие стравуваат дека ќе останат  без парно, затоа што, како што тврдат, ниту е купена потстаницата ниту е направен проект за поставување. Во дел од становите биле ставени радијатори, но без вентили, а кутиите во влез биле празни, без опрема. Поради тоа се обратиле во ЕСМ-Дистрибуција на топлина за да се информираат дали „Декон ком“ поднел барање за приклучок на зградата на топлинска енергија и до каде е таа постапка. Оттаму добиле одговор дека во март 2023 година на барање на фирмата -инвеститор се изготвени и доставени Решение за согласност за приклучување на системот за дистрибуција и Техничко решение за топлинска потстаница.

Следната фаза било фирмата да достави до ЕСМ основен проект врз основа на техничките податоци од Решението за енергетска согласност за пристап на дистрибутивниот систем, но тоа досега не било направено. Дури потоа треба да следува изведба на приклучокот и топлинска енергија, па откако ќе завршат сите фази инвеститорот може да поднесе барање за пробна испорака на топлинска енергија во објектот.

Граѓани се жалат дека цела година чекаат вселување во нова зграда во Маџир Маало, инвеститорот вели – може да се вселат кога сакаат

Од „Декон ком“ до овој момент не одговорија на нашите прашања дали веќе набавиле потстаница за парно греење, но и дали со оглед на фактот дека за месец и пол започнува грејната сезона дотогаш можат да ги завршат сите процедури и на идните станарите да им се обезбеди греење, доколку се направи технички прием на новиот објект.

Денеска да започне не може да стигне до почеток на грејна сезона, сега да почне дури на пролет ќе биде тоа готово. Нам ни вика- влезете, вселете се, а како да се вселиме? Тој не принудува да влеземе без записник, а тоа значи ако се случи нешто во станот одговорноста е наша. Не е точно и тоа што го тврди за „Слободен печат“ дека во новата зграда веќе се вселени некои од станарите. Никој не е вселен освен неговиот адвокат кој извршува деловна активност, но не живее таму. Од станарите не е вселен ниту еден – децидни се купувачите на станови во зградата, кои ни приложија фотографија сликана навечер за да покажат дека не свети  во ниеден стан од зградата.

Од „Декон ком“ пак во изјава за нашиот медиум истакнаа дека становите се целосно завршени и спремни за примопредавање и дека се работи на заедничките инсталации и отстранување на ситни недостатоци во изведбата.

Потенцираме дека во објектот веќе има станови кои се користат по взаемна согласност помеѓу купувачите и нас како инвеститори, а легитимно право е на секој купувач да не започне со користење на станот додека не се направи завршен извештај од страна на надзорот (технички прием) и официјално примопредавање – изјавија неодамна од „Декон-ком“.

Идните станари укажуваат и на други сѐ уште незавршени работи во објектот како што е на пример непоставена вентилација на паркингот на минус 2 каде не може да има природна вентилација, дека нема гелендери на скалите до влезот, но и на скалите во ходникот на зградата, дека е извршен само прв технички прием и тоа на едниот лифт, но не и на лифтот до гаражите и други забелешки.

Тие подготвиле барања до повеќе надлежни институции и инспекции, потпишани од сите купувачи на станови за да дојдат во објектот и да направат контрола..

Ниеден станар нема платено стан по повластена цена. Кога ги уплаќавме становите беше по пазарна цена, 1600 евра за квадрат кога најскапиот стан беше 1800. Значи си плативме реална пазарна цена, не сме ги добиле становите за џабе или по некоја минимална цена за ова да ни се случува. Сега сакаат да не присилат да се вселиме без технички прием, без потстаница за парно затоа што знаат дека на некои од нас ни „гори под нозете“ со кирии, со кредити – разочарано велат станарите со кои разговаравме.