Обновен и свежо обоен, култниот знак „Холивуд“ висок 15 метри во Грифит Парк, во планините над Лос Анџелес, го слави својот 100-ти роденден. По специјалните настани во текот на годината и објавувањето на големите планови за одбележување на јубилејот на оваа атракција, главната забава ќе се одржи во декември на булеварот „Холивуд“, пишува „Пункуфер“.

Иако не е познат точниот датум кога е поставен, вечерта на 8 декември 1923 година, за прв пат се запалил огромниот натпис од тринаесет букви и тоа во три фази: „Холи“ (Holly), потоа „Вуд“ (Wood) и на крајот „ Ленд“ (Land), а потоа и целиот натпис „ Холивудленд“ (Hollywoodland).

Тоа требало да биде само обичен осветлен оглас за продажба на недвижен имот во новиот градски кварт и после година и пол да се демонтира. Сепак, иако е сакан и мразен, тој сè уште стои. Одамна стана незаменлив детал од разгледниците и филмовите, симбол на цел еден свет и индустрија и култна атракција на Лос Анџелес.

Поставен е во 1923 година, како голема светлечка реклама за станбениот комплекс што се градел под него во Холивуд Хилс. Имал четири букви повеќе од оној што го знаеме денес, бидејќи на него било напишано името на новата населба – Холивудленд (Hollywoodland).

Првите новинарски написи во весниците за „електричниот знак“, кој бил „засилен“ со 4.000 светилки што го осветлувале ноќе, се појавиле во декември 1923 година. Овој дотогаш невиден ефект бил вистинско чудо бидејќи ништо слично не постоело во светот во тоа време: Вегас почнал да се гради дури две децении подоцна.

Во 1932 година, младата актерка Пег Ентвистл, која таблоидите ја нарекле „The Hollywood Sign Girl“ се самоубила фрлајќи се од 15-метарската буква „h“ и така стана трагична и трајна инспирација и симбол за дискусии за привлечноста и опасностите на Холивуд.

Натписот потоа станал омразен, до почетокот на 1940-тите бил целосно оштетен, а долго време не бил ни осветлен бидејќи било прескапо, па на крајот на деценијата било одлучено да се обнови, но без последните четири букви, и така стана „Холивуд“.

Во 1973 година, натписот бил прогласен за културно-историски споменик на Лос Анџелес, но и покрај тоа, тој сè уште не бил вистински одржуван, па кога првата буква се срушила и останал само „Оливуд“, бил исмеван.

Подоцна, врвот на буквата „д“ и целото трето „о“ спектакуларно се тркалале по планината, а втората „л“ била запалена од пироман. На крајот на 1970-тите, тој бил спасен од таткото на „Плејбој“, Хју Хефнер. Тој организирал „продажна забава“ во својата позната вила, а купувачи биле познати личности или компании, меѓу другите Алис Купер и „Ворнер Брос“. Сумата од околу 27 илјади долари по буква била доволна за целосна реставрација.