„Нетфликс“ подготвува нов филм заснован на остварувањето „Си беше еднаш во Холивуд“, под режисерската палка на Дејвид Финчер, пренесува „Јуроњуз“.

Бред Пит ќе се врати во улогата на каскадерот Клиф Бут, која му го донесе првиот Оскар, а Тарантино ќе се појави како сценарист.

Иако медиумите првично претпазливо ја пренесуваа оваа вест, сомневајќи се дека станува збор за првоаприлска шега, „Дедлајн“ во меѓувреме ја потврди информацијата.

Ретко се случува истакнат режисер да режира продолжение на филм од друг реномиран автор, а покрај тоа, последен пат кога Тарантино напиша сценарио за филм што не го режираше самиот беше во далечната 1996 година – за „Од самрак до зори“.

Познато е дека Тарантино е жесток критичар на платформите за стримување како „Нетфликс“, но, како што стојат работите, сепак ќе соработува со нив, со оглед на тоа што Финчер е врзан со договор за оваа платформа.

Снимањето треба да започне ова лето, а за него е издвоен буџет од дури 200 милиони долари, од кои Тарантино, наводно, ќе добие 20 милиони за сценариото. Дел од средствата ќе бидат искористени и за ангажирање на Леонардо Дикаприо, иако само во епизодна улога.

Оригиналниот филм „Си беше еднаш во Холивуд“, кој Тарантино го напиша и режираше, премиерно беше прикажан во 2019 година и ја следеше приказната за телевизиската ѕвезда Рик Далтон (Леонардо Дикаприо) и неговиот каскадер Клиф Бут (Бред Пит), додека се обидуваат да се снајдат во промените во филмската индустрија.

Се верува дека новиот филм нема да биде класично продолжение, туку приказна инспирирана од оригиналниот филм – можеби дури и еволуција на сценариото на Тарантино „Филмскиот критичар“, кое требаше да биде неговиот десетти и последен филм, пред да се откаже од него.

Тарантино претходно откри дека „Филмскиот критичар“ бил инспириран од вистински филмски критичар кој пишувал за таблоид, а чии текстови често ги читал како тинејџер.

„Пишуваше за мејнстрим филмови и беше вториот критичар во редакцијата. Сметам дека беше многу добар, но и крајно циничен. Неговите рецензии беа мешавина од раниот Хауард Стерн и она што би се случило ако Тревис Бикл (од ‘Таксист’) стане филмски критичар“, изјави Тарантино.

Дејството на филмот требаше да биде сместено во Јужна Калифорнија во 1977 година, а Бред Пит веќе имаше потпишано договор за главната улога, што би била неговата трета соработка со Тарантино (по „Неславни копилиња“ и „Беше еднаш во Холивуд“).

Се наведува дека Пит толку многу го засакал сценариото што не сакал да се откаже од него, а сега му се исполни таа желба – иако во малку изменета форма.

Бред Пит и Дејвид Финчер досега соработувале на неколку култни филмови: психолошкиот трилер „Седум“, култниот класик „Борачки клуб“ и адаптацијата на приказната на Фицџералд „Необичниот случај на Бенџамин Батон“.