Ана Крстаноска е млада и креативна жена, која стои зад еден од најубавите инстаграм-профили за храна кај нас – „Ана кичен корнер“ (ana_kitchen_corner).

Готвењето ѝ е вистинска пасија и хоби на кое му пристапува со голема љубов и посветеност.

– Спремањето храна го доживувам како мое хоби, кое го надополнувам со многу љубов и внимание секогаш кога сум во можност. Среќна сум кога им спремам нешто вкусно на моето семејство и моите пријатели и токму тоа ми ја полни душата со позитивна енергија – вели таа.

Денеска Ви го претставуваме нејзиниот рецепт за колачиња со крем.

– Велат дека во виното е вистината, а во љубовта смислата за живот. Затоа останете засекогаш заљубени во виното, а опиени од љубовта. По повод Свети Трифун и Свети Валентин, ви ги споделувам овие прекрасни вкусни тарт срциња полни со крем кој ќе ве воодушеват – вели Крстаноска.

Потребни состојки:

• 330 гр брашно
• 130 гр шеќер во прав
• 1 ванилин шеќер
• Прстофат сол
• 150 гр ладен путер исечкан на коцки
• 1 јајце
• Крем од лешници

Подготовка:

Измешајте ги сите состојки и додајте го путерот, па измешајте ја целата смеса во миксер. Кога убаво ќе ја соедините, без да има видливи парчиња од путерот, формирајте топка и ставете ја во пластична фолија во фрижисер за да „одмори“ 30 минути.

Потоа оставете ја на собна температура пет минути да се пушти тестото. Расукајте со сукало и извадете кругови со поголема чаша. Круговите се местат во калап за мафини, оставајќи како вдлабнатина.
Потоа се полнат со крем и од горе ставате мало срце формирано од тестото.

Се печат дваесетина минути во загреана рерна на 180 степени.

На здравје!