Општинската организација на Црвениот крст Куманово лани бележи 2.649 крводарувања, што е приближно на исто ниво како и годините пред пандемијата, информираа денеска од организацијата.

Минатата, 2022 биле организирани 29 крводарителски акции кои се на слично ниво како и претходните години. Лани, по две години пауза се реализираа и крводарителски акции по средните училишта, по приватни компании, здруженија кои за време на пандемијата паузираа со организирање масовни акции.

Бројката на крводарувања е на приближно исто ниво како и годините пред пандемијата, очекуваме годината дополнително да се стабилизира состојбата со организирање крводарителски акции во трите општини каде што работиме Куманово, Старо Нагоричане и Липково, изјави в.д секретарот на кумановскиот Црвен крст, Ива Младеновска.

Во јануари ќе се одржат две веќе редовни крводарителски акции, првата во ЈП „Водовод” и втората акција со членовите на рибарското друштво „Мак Дам”.