На неодамна завршениот Саем на книга беше претставен шестиот роман на Анде Јанков, со наслов „Мементо мори“. Станува збор за петтиот дел од серијалот за Виктор Николов и продолжение на романот „Кобајаши Мару“.

Дејството на романот се одвива во Скопје и во Загреб, а во центарот на случувањата е театарската претстава „Мементо мори“, своевидна преработка на „Хамлет“, во изведба на Битолскиот народен театар на сцената во Загреб. Паралелно со тоа, го следиме и животот на Виктор Николов, една година после случувањата во претходниот дел.

За романот, рецензентката Софија Стојков напиша: „Низ целото дејство во книгата провејува потребата да се остави некакво наследство и легитимитет во дела, поголеми од материјалното уживање, дури и по цена на сопствениот живот, бидејќи соочени со смртта, единственото важно прашање е каква смисла имал животот?“

Романот „Мементо мори“, како и останатите пет книги на Јанков, се во издание на „Антолог“. Во текот на мај Јанков ќе присуствува и на првото издание на „Белградски трилер фестивал“, а промоцијата на романот „Виенски гамбит“ на бугарски јазик е закажана за 22 мај во македонскиот КИЦ во Софија.

(Текстот е објавен во „Културен печат“ број 281, во печатеното издание на весникот „Слободен печат“ на 17-18.5.2025)