Канцеларијата за безбедност на храна и ветеринарство на Швајцарија пријави случај на атипична говедска спонгиформна енцефалопатија (БСЕ), по два случаи во Шпанија и Холандија. Случајот бил откриен при рутинска проверка на БСЕ во кантонот Граубинден, кај 12-годишно животно.

БСЕ ја напаѓа мозочната супстанција на добитокот. Животните се разболуваат со типична БСЕ поради потрошувачката на добиточна храна базирана на животински оброк што содржи приони.

„За разлика од класичната форма, атипичната БСЕ може да се појави спонтано и без никаква поврзаност со животинскиот оброк во храната. Трупот е изгорен и затоа не претставува опасност за другите животни или за луѓето“, велат од канцеларијата.

Јадењето месо контаминирано со БСЕ може да предизвика смртоносна болест Кројцфелд-Јакоб кај луѓето. Хранењето на преживарите со брашно од месо и коски е забрането во Швајцарија од 1990 година, а многу други земји исто така го забранија. Во доцните 1980-ти, БСЕ се појави главно во Британија, која забележа повеќе од 180.000 случаи на болеста поради хранење животни со загадено месо и коскено брашно.

Во Германија за прв пат болеста била дијагностицирана во 2000 година, а биле регистрирани вкупно околу 400 случаи, меѓу кои и три нетипични.

Последниот случај е регистриран во Баварија во 2021 година. Во февруари оваа година, Холандија пријави случај на атипична БСЕ. Месото не влезе во синџирот на исхрана, соопшти Министерството за земјоделство на земјата. Последен пат таков случај се случи во Холандија во 2011 година. Шпанија, исто така, објави случај на атипична говедска спонгиформна енцефалопатија (БСЕ) минатиот месец, а Бразил го прекина извозот на говедско месо поради болеста, информира Хина.