Британскиот крал Чарлс ја прошири колекцијата на недвижнини со купување на нов имот вреден четири милиони евра во Вилтшир.

Овој имот, кој се наоѓа директно до викендицата на неговата сопруга, кралицата Камила, е купен од безбедносни причини и за да се спречи имотот да се користи за свадби и краткорочни изнајмувања, пренесува „Дејли мејл“.

Информацијата ја потврди пријател на кралицата Камила, кој објасни дека купувањето било неопходно за да се заштити приватноста на нејзиниот имот.

Според него, потенцијалниот купувач планирал имотот „Старата воденица“ да го користи за туристички цели, што би можело да ја загрози приватноста на кралицата Камила.

„Тоа беше практично решение и здрав финансиски потег што ќе му овозможи на нејзиното височество да продолжи да ужива во нејзиниот сакан имот без да ја загрози нејзината приватност“, изјави извор близок до кралското семејство.

Наводно, кралицата Камила е благодарна за овој потег, особено ако се земе предвид стресот низ кој поминала во изминатата година, вклучувајќи ги здравствените проблеми на нејзиниот сопруг, кралот Чарлс и принцезата Кејт Мидлтон, на кои и двајцата им бил дијагностициран рак.

Пријател на кралицата открил и дека Камила ужива да поминува време на својот имот, особено кога нема службени обврски.

„Камила сака да поминува време таму со своето семејство, да ги шета кучињата и да се грижи за своите коњи“, додала пријателката.

Пред кралот Чарлс да го купи овој имот, поранешниот сопственик, бизнисменот Фил Клејтон, го изнајмил имотот преку „Ербиенби“.

Имотот е многу популарен, а гости од Европа, САД и Австралија престојуваа на имотот речиси цела минатата година. Исто така, претходните сопственици планираа да го реновираат имотот, да ги прошират просторите, да додадат нови доградби и да го преуредат дворот во италијански стил.

Претставниците на Камила поднесоа три официјални жалби поради потенцијален ризик од поплави, но овие жалби беа одбиени.

„Ситуацијата стануваше неподнослива“, рекла пријателката на Камила.