Американската пејачка Бритни Спирс остави силен белег во историјата на доделувањето на видеомузичките награди на Ем-ти-ви, а нејзините моќни настапи се нешто за што љубителите на поп-музиката и ден-денес дискутираат.

Во последните неколку месеци, многумина шпекулираа дека постои голема веројатност пејачката да настапи на годинашното доделување на видеомузичките награди на Ем-ти-ви, кое ќе се одржи на 7 септември во Њујорк, САД.

Сега извор близок до Спирс, во изјава за „Пипл“, открива дека пејачката нема да се појави на овој настан.

„Никогаш не беше планирано таа да настапи на наградите“, изјави изворот.

Гласините се појавија кон крајот на јули, откако еден популарен профил на Икс објави дека Спирс ќе изведе десетминутен микс од нејзините хитови, како вовед во изненадното издавање на нов албум во септември.

Иако оваа вест ги разочара многумина, Спирс има богата историја со наградите на Ем-ти-ви. Нејзиниот настап од 2001 година со песната „I’m a Slave 4 U“, каде што на сцената се појави со питон околу вратот, стана легендарен. Во 2003 година, таа ја шокираше јавноста со бакнежот со Мадона, заедно со Кристина Агилера.

Во 2007 година, ја испеа „Gimme More“ и доби силни критики. Во своите мемоари „Жената во мене“ (The Woman in Me), Спирс откри дека не сакала да настапи тој ден поради тешка година на приватен план, но била принудена од својот тим и завршила со паничен напад зад сцената.

Во 2011 година ја доби наградата „Мајкл Џексон“ за авангардно видео, а последен пат настапи на видеомузичките награди на Ем-ти-ви во 2016 година.

Иако не настапува на големи сцени, Спирс е активна на Инстаграм каде редовно објавува видеа како танцува.

Во јуни сподели фотографии и видеа со својот син Џејден (18), кого го има од бракот со Кевин Федерлајн. Поранешната двојка има и постар син, Шон Престон (19).

ВИДЕО | Бритни Спирс објави дека посвоила девојче, го кажа и нејзиното име