Дарио Витале е назначен за нов креативен директор на „Версаче“, соопшти модната куќа, а оваа вест означува историска транзиција. Дебитантската колекција на Витале ќе биде првата во повеќедецениската историја на куќата која креативно не ја води Донатела Версаче.

Во исто време кога беше објавено назначувањето на нов креативен директор, куќата изјави дека Донатела ќе продолжи да дејствува како олицетворение на брендот. Нејзината титула се менува во главен бренд амбасадор.

„Поддршката за новата генерација дизајнери отсекогаш ми била важна. Возбудена сум што ни се придружи Дарио Витале и возбудена сум што ќе го видам Версаче со нови очи. Сакам да им се заблагодарам на мојот неверојатен дизајнерски тим и на сите вработени со кои имав привилегија да работам повеќе од три децении. Беше најголема чест во мојот живот да го продолжам наследството на мојот брат Џани. Беше вистински гениј, но се надевам дека имам малку од неговиот дух и истрајност. Во мојата нова улога како главен амбасадор на брендот, ќе останам неговиот најголем поддржувач. Версаче е во мојата ДНК и секогаш во моето срце“, се вели во официјалното соопштение на брендот.

„Навистина ми е чест да му се придружам на Версаче како главен креативен директор и да бидам дел од оваа посебна и моќна луксузна модна куќа создадена од Џани и Донатела. Куќата на Версаче има уникатно наследство кое опфаќа децении и ја обликува историјата на модата. Би сакал да изразам искрена благодарност до Донатела за нејзината доверба во мене и за нејзината неуморна посветеност на извонредниот бренд што денес е Версаче. Привилегија е да придонесам за идниот раст на компанијата и нејзиното глобално влијание преку мојата визија, експертиза и посветеност“, рече Витале.

Кој е Дарио Витале, новиот креативен директор на Версаче?

41-годишниот дизајнер е надалеку познат како еден од највозбудливите и најиновативните нови таленти на миланската модна сцена. Дипломирал на „Istituto Marangoni“ во 2006 година, прво една година работејќи во брендот „Dsquared2“, а потоа во „Botega Veneti“ под раководство на Томас Маер.

Тој се приклучи на брендот „Miu Miu“ во 2010 година, каде што се искачи на позицијата директор за дизајн и менаџер за имиџ, а го напушти сестринскиот бренд Прада овој јануари.

Денешните вести доаѓаат седум години откако семејството Версаче го продаде својот контролен удел во компанијата, заедно со 20 отсто од акциите во Блекстоун, на американската групација Капри за 1,83 милијарди евра. Како дел од договорот, Донатела остана како главен креативен директор на Версаче за да го води дизајнот на колекциите и да ја претставува куќата пошироко.

Во моментов кружат гласини дека „Капри холдингс“ планира да го продаде „Версаче“. Групацијата, која исто така ги поседува Мајкл Корс и Џими Чу, се најде под силен притисок по колапсот на предложеното спојување со Тапестри минатата година.

Создавањето на најголемиот луксузен конгломерат во американска сопственост, вреден 8,5 милијарди долари, беше блокиран од Федералната трговска комисија поради конкуренција. Оттогаш беше објавено дека и Версаче и Џими Чу се на продажба, а Прада Груп наводно меѓу заинтересираните страни.