Граѓаните заслужуваат европски услови и ние имаме обврска тоа да им ги обезбедиме, изјави премиерот Димитар Ковачевски по повод потпишувањето на договорите со општините.

– Преку програмата ТАВ, на која што работеше вицепремиерот Битиќи заедно со неговите колеги и, се разбира, со општините, обезбедивме реализација на вкупно 94 инфраструктурни проекти во целата држава со вкупна вредност од 50 милиони евра. Преку деветтиот пакет антикризни мерки се обезбедуваат поволни кредити за општините за инвестиции во енергетската ефикасност, со цел намалување на потрошувачката на струја – нагласи Ковачевски.

Ковачевски посочи дека преку буџетските програми за рамномерен регионален развој, министерот Пенов, заедно со општините, работел на намалување на диспаритетите во 2023 година. Затоа Владата одлучи да финансира 135 проекти во општините и во планските региони, во вредност од над 14 милиони евра.

– Со измените на Законот за финансирање на единиците на локалната самоуправа на кој што јас лично имам работено, заедно со министерот Бесими, ја унапредивме фискалната децентрализација и ги зголемивме приходите на општините што најдобро се гледа од Предлог-буџетот за 2024 на кој што трансферите на општините по овој основ се зголемени – рече Ковачевски.

Тој порача дека поддршката за општините продолжува, затоа што секој граѓанин, во секоја општина е важен.

– Преку вложувањето во општините, се подобрува животниот стандард и на граѓаните и се обезбедува рамномерен регионален развој подеднакво како во помалите, така и во поголемите општини – нагласи премиерот.