Поранешниот директор на ЕСМ, Васко Ковачевски кој е осомничен за несовесно работење, не се откажал од македонското државјанство, изјави министерот за внатрешни работи Панче Тошковски.

– Вчера имаше многу шпекулации во однос на вашето прашање и каде се наоѓа или дали се откажал од македонското државјанство. Посоченото лице е во рамки на регистарот на државјани на Македонија и е македонски државјанин. Не побарало отпуст, согласно информациите што ги имам – изјави Тошковски.

Првиот човек на МВР, изјави дека сè уште не е позната локацијата на којашто се наоѓа Васко Ковачевски.

Вчера при извршени претреси во Битола, Неготино, Кичево, Велес и Скопје за време на акцијата се обезбедени голем број материјални докази, а кај три лица пронајдени се и одземени околу 130.000 евра.

Дел од осомничените во својство на службени лица во АД ЕСМ и АД „Пошта на Северна Македонија“ создале група која имала за цел вршење на кривични дела злоупотреба на постапката за јавен повик, доделување на договор за јавна набавка или јавно-приватно партнерство, злоупотреба на службена положба и овластување и перење пари.