Премиерот Димитар Ковачевски на денешната средба со в.д. лидерот на Алијанса за Албанците Арбен Таравари нема да излезе со понуда за влез на Алијанса во Владата, вели за „Слободен печат“ висок функционер на СДСМ. Претходно од Алијанса брифираа дека на средбата со премиерот очекувањата се да им биде понудено да станат дел од владината коалиција.

-Денешната средба меѓу Ковачевски и Таравари е продолжение на лидерската средба која се одржа неодамна во насока на барање поддршка за блокираните закони во Собранието од правосудството, борбата со корупцијата како и за мерките за справување со економската и енергетската криза – вели функционерот.

Тој додава дека ова не значи дека ќе нема понуда за влез на Алијанса во Владата, но дека таа нема да биде на денешниот состанок.

Ковачевски го поканил Таравари бидејќи на лидерската средба позитивно рефлектирал за уставните измени. Според функционерот, Ковачевски не планира на одделна средба да го кани лидерот на опозициската ВМРО-ДПМНЕ Христијан Мицкоски бидејќи тој на лидерската не дал поддршка за уставните измени и за одблокирање на законите. Средби ќе нема ниту со претседателите на опозициските Беса и Левица кои ја бојкотираа лидерската средба.

Таравари пред денешната средба со премиерот Димитар Ковачевски во интервју за  „Фронтлајн.мк“ кажа дека неговата партија ќе влезе во составот на Владата само доколку се исполнат три услови.

– Еден од трите услови е да нема предвремени парламентарни избори пред 2024 година. Вториот услов е да имаме автономија на институциите кои ќе ги водиме, значи да нема ограничување. И третото е да има динамика, за тоа што ќе се договориме да се применува во пракса, кажа Таравари.