Премиерот Димитар Ковачевски учествуваше на Тркалезна маса во рамки на четвртиот Самит на Советот на Европа кој се одржува во Рејкјавик, Исланд. Во своето обраќање, Ковачевски ја истакнал важноста од брзата интеграција на земјите од Западен Балкан во ЕУ, како инвестиција во зацврстување на безбедноста на Европа.

Од владината прес-служба соопштија дека тој се осврнал и на обврската на сите земји силно да ја осудат агресијата против основните принципи на меѓународното право и светскиот поредок, меѓу кои и демократијата, како и да покажат солидарност и единство во одбраната на моралните вредности, посебно во време на глобални предизвици.

Со Тркалезната маса, на Самитот на Советот на Европа, ко-претседаваа претседателот на Романија Клаус Јоханес и премиерот на Луксембург Хавиер Бетел, а учествуваа претседателот на Европскиот Совет Шарл Мишел, претседателката на Словачка Сузана Чапутова, премиерите на Грузија Иракли Гарибашвили, Норвешка Јонас Гар Сторе и Италија Џорџија Мелони.