Европратеникот на бугарската партија ГЕРБ, Андреј Ковачев ги повикува македонските власти, наместо да трошат пари на, како што вели, „неплодни лобистички кампањи и градење митови, да ги исполнат своите обврски, да раскинат со комунистичкото наследство на Титова Југославија и да се приближат кон ЕУ со реални дејствија“.

Ковачев поттикнат од изјавата на Мицкоски дека Европа „ја слушнала вистината за македонскиот идентитет“ и дека извештајот на ЕП за напредокот на земјата ќе биде усвоен искоментира дека „во нацрт-извештајот на Европскиот парламент нема многувековен македонски идентитет, ниту во текстот, ниту како предлог од кој било европратеник. Според бугарскиот европратеник ова е уште една манипулација и фикција од страна на Скопје.

„Обидот на Христијан Мицкоски да го претстави извештајот на ЕП како „признание за македонската вечност“ е евтин политички трик. Неговата цел е да прикрие нешто друго – дека всушност се согласува со козметичкото вклучување на Бугарите во преамбулата на Уставот“, пишува Ковачев.

Според Ковачев, ова не е доволно за да се започнат преговорите со Европската Унија. Ковачев потсетува под кои околности Бугарија може да го запре процесот:

„Ако условите од Договорот за добрососедство од 2017 година и неговите протоколи не се почитуваат и правата на македонските Бугари се прекршени. Бугарскиот устав е граѓански – не признава етнички заедници. Затоа не може да има „етнички Македонец“ во Комитетот за малцинства. Таков комитет едноставно не постои“, тврди Ковачев.