Кошаркарите без победа ги завршија квалификациите за пласман на СП 2023
Кошаркарската репрезентација на Македонија го доживеа и шестиот пораз во последниот шести натпревар од првата фаза од квалификациите за пласман на Светското првенство 2023 година.
Препорачано
Кошаркарите денеска во СЦ „Борис Трајковски“ загубија од селекцијата на Украина со 68:73 и го освоија последното место во групата „Г“ со кош разликата од минус 122 (373:495). Токму денеска, кошаркарите го доживеаја најтесниот пораз од само минус пет, додека најубедливиот пораз беше пред четири дена кога Шпанија славеше со 36 поени (80:44).
Украинците одиграа одлична прва четвртина која ја решија во своја корист со 21:35 притоа постигнувајќи седум тројка. Натпреварот го отворија со двете тројки на Михалик по што четвртина помина во обидите на избранците на селекторот Драган Бајиќ да фатат резултатски приклучок.
Но, расположените Украинци имаа одговор, тоа беше шутот од далечина, постигнаа дури седум тројки и по десет минути игра имаа убедливи 21:35.
И втората четвртина започна со добра игра на Украинците кои дојдоа и до плус 17 (30:47) по што следеше будење на „црвено-жолтите“ и серија од 14:0 со која се врати надежда за триумф. При резултат 46-50 не беа реализирани зицери за целосен камбек, но агресивната одбрана ја одржи Македонија во игра, па по поените на Робев за 51-54 украинскиот селектор беше принуден да побара тајмаут.
Тоа вроди со плод и Украинците погодија тројка, но Николов со положување постигна поени за 53:57 со кои се влезе во последната четвртина.
Во одлучувачката четвртина, македонските кошаркари имаа достижна негатива се до средина на четвртината по што Украина направи серија од 0:8 за 57:69.Македонија не се откажа и по поените на Јакимовски намали на 65:69 и нов тајмаут на Украинците. При овој резултат имавме три напади за камбек, но положувањето на Јакимовски заврши на обрачот,веднаш потоа непрецизни за тројка беа Војдан Стојановски и Јакимовски, по што Украинците ја заверија победата и ја оставија Македонија без ниту еден триумф во квалификациите за СП 2023.
Андреј Јакимовски со 17 поени и 9 скока беше најдобар во „црвено-жолтиот“ табор, а добра партија прикаа Војдан Стојановски со 15 и Бојан Крстевски со 13 поени. Свјатослав Михалик со 24 поени беше најдобар кај Украина.
