Како што информираат од Одбојкарската федерација на Македонија, одложен е двомечот помеѓу Вардар и Калцит Камник од Словенија во рамките од 1/16 финалето во европскиот Челинџ куп.

Откако ЦЕВ понуди, нашиот претставник го прифати одложувањето, а причината е позитивни играчи и членови на стручниот штаб на коронавирус во противничките редови.

Натпреварите беа закажани за вторник (3 ноември) и среда (4 ноември) на теренот на словенечката екипа, но по најновите тестирања, ЦЕВ го консултираше Вардар кој прифати да игра во периодот од 17-19 ноември 2020 година без оглед што можеше да одбие и да бара директен влез во осминафиналето и многу веројатно средби со тим од едно од најсилните првенства во светот – италијанскиот репрезент Алианц Пауерволеј од Милано.

Другиот наш претставник во Челинџ купот, тимот на Џио Струмица, според планот, денеска (17.00 часот) и утре (12.00 часот) ќе гостува во Кипар кај Омонија со надеж да се избори за натпревари со подобриот од пресметката меѓу Зират банка Анкара и Хапоел Кфар Саба.

Со Владо Милев, Лука Костиќ и Васе Михаилов како засилувања на примачката позиција и неколку перспективни одбојкари во составот на Џио Струмица, заедно тренерот Кирил Ричлиев ќе се обидат да ја елиминираат кипарската екипа во која интернационалци се мексиканскиот техничар Педро Рангел и црногорскиот примач Марко Бојиќ.