Основачот на Телеграм, Павел Дуров, предупреди за она што тој го нарекува можна координирана кампања за дезинформации насочена кон „поткопување“ на угледот на неговата апликација за пораки, додека Русија се подготвува да лансира свој државен месинџер наречен Max.

Во објава на својот официјален канал на Телеграм, Дуров наведе низа инциденти што ги окарактеризира како обиди за дискредитација на платформата, вклучувајќи го и ширењето на „лажни и сензационалистички“ извештаи во медиумите и на интернет, објави „Москва Тајмс“.

„Повеќе од 12 години, Телеграм се залага за правото на приватност и слободен пристап до информации. Затоа честопати стануваме цел на медиумски притисок од различни насоки. Можно е ова да не се само безопасни новинарски грешки, туку оркестрирана кампања“, напиша Дуров.

Според него, еден од примерите бил сатиричен напис во кој лажно се тврдело дека Телеграм наскоро ќе го напушти рускиот пазар.

„Иако наменет како шега, веста ја објавија неколку медиуми без соодветна проверка“, рече Дуров.

Тој, исто така, се осврна на обвинувањата дека Телеграм ги блокира каналите на OSINT што ја покриваат војната во Украина, велејќи дека привремените блокади се автоматски поради споделувањето лични информации и дека каналите брзо се обновени, иако рече дека тоа не се одразило во известувањето.

Претседателот на Комитетот за информатичка политика на Државната дума, Сергеј Бојарски, минатата недела предупреди дека Телеграм и WhatsApp би можеле да бидат погодени со построги санкции, поради наводни прекршувања на законот, вклучително и непочитување на обврската за локализирање на податоците и неотстранување на забранетата содржина.

Дуров, роден во Санкт Петербург, беше уапсен во Париз минатата година под обвинение дека не отстранил екстремистичка содржина од платформата, но набрзо беше ослободен со кауција.