Претседателот на Конфедерацијата на Карибите, Средна и Северна Америка (Конкакаф), Виктор Монтаљани, денеска го отфрли предлогот на својот јужноамерикански колега кој се залага за проширување на Светското фудбалско првенство во 2030 година на 64 репрезентации.

– Не верувам дека проширувањето на Светското првенство на 64 репрезентации би било добро за турнирот, а воедно и за фудбалскиот екосистем, националните тимови и клупските натпреварувања, лигите и играчите – рече Монтаљани.

Минатата недела, претседателот на Јужноамериканската фудбалска конфедерација (Конмебол), Алехандро Домингез, официјално се заложи СП 2030 да се игра со 64 селекции.

Предлогот за проширување претходно беше отфрлен од претседателот на Азиската фудбалска конфедерација (АФЦ), шеикот Салман бин Ибрахим Ал Калифа, како и од претседателот на Европската фудбалска унија (УЕФА), Александар Чеферин.

Сепак, овој предлог ќе биде „анализиран“ според генералниот секретар на Меѓународната фудбалска федерација (ФИФА), Матијас Графстром.

Од 1998 година, 32 национални тимови се натпреварувале на Светските првенства, а за 2026 година е планирано историско проширување за дополнителни 16 места во САД, Канада и Мексико.