Дискографската куќа „ПМГ Џез“ најави богата година со изданија, концерти, промоции и со ново издание на фестивалот „Крај Вардарот џез“, што ќе се одржи во септември.

Серијата настани ќе биде отворена на 14 април, во „Макка бар“, каде „ПМГ Џез“ ќе реализира два концерти на македонските музички состави „Стој, После!“ и „Кантон 6“.

Еден од составите на младиот и талентиран Мартин Џорлев „Стој, После!“, кој го реализира во соработка со Андреј Димовски, само што го издаде својот прв извонредно богат и експериментален албум „Умре ти, се родив јас“. Овој четврток за прв пат во живо ќе може да се проследи дел од ова интересно музичко патување.

Албумот „Умре ти, се родив јас“ се состои од четири делови: доживување/дознавање, сеќавање/истражување, шум шума загуба и псалм, а достапен е за преслушување на Јутјуб-каналот на составот.

Со концерт ќе се претстави и добро познатиот, како во домашен, така и во регионален контекст, електро-етно-џез состав „Кантон 6“. Во состав на веќе признатите музичари и културни дејци Мирко Попов, Синиша Евтимов и Владан Дробицки ќе може да се слушнат дел од композициите кои се најдоа на последниот студиски албум „#Јazzus“, кој музички не води низ различни мистични, епски и историски трансформации и доживувања поврзани со вистината за настанокот на џезот и неговата 500.000 годишно постоење како македонска традиционална музика, известија од „ПМГ Џез“.

Концертите ќе почнат во 21 часот, а влезот е бесплатен.