Концептот на фестивалот „Омнибустопија“ е со музика во преден план
Шестото издание на фестивалот „Омнибустопија“, во организација на Асоцијацијата за културна соработка и истражување „Аксиома“, ќе се одржи од 3 до 6 ноември на повеќе локации низ Скопје.
Препорачано
Програмата претставува своевидна рекапитулација на активностите на „Аксиома“ во последните 12 месеци, но и антиципација на она што ќе следува во догледна иднина. Тоа значи дека музиката, повеќе од кое било претходно издание на „Омнибустопија“, ќе биде во преден план и ќе може да се проследат несекојдневни концерти, изложба, разговори и работилница.
Програмата ќе биде отворена на 3 ноември, во 20 часот, во „Котур“ со промоција на монографија изработена во сито-печат: колажи од улични плакати, собирани во Скопје, Виена и Братислава од ноември 2023 до февруари 2024 година (коиздание на „Аксиома“ и „Партизанска штампа“).
На настанот ќе има разговор со Билјана Димитрова, Милош Стојановиќ, Дамјан Илиќ и Јован Гаковски од „Партизанска штампа“ со Владимир Лукаш, а ќе биде отворена и изложба / инсталација на метаколажи. Вечерта ќе ја заокружи концерт на „Намуз“: Андреј Татарчевски – електрична гитара / ефекти и Кристијан Новковски – тапани.
Во „Салон 19:19“ при КИЦ-Скопје на 5 ноември ќе се одржат концерт на „Одрон трио“: Филип Букршлиев – електрична гитара, Нинослав Спировски – тенор саксофон / кларинет и Дени Омерагиќ – контрабас; и концертна промоција на албумот „Asphalt Calcutta“: Јордан Костов – пијано, Ник деКарло – туба и Дарио Циевски – тапани.
На 6 ноември во „Салон 19:19“ концерт ќе одржи Мартин Џорлев („Луфтанза“, „Стој, После!“, „Зулу 3.4“…) на електрична гитара, пијано, вокали и електроника; а ќе се одржи и концертна промоција на албумот „Floating Steps“: Глигор Кондовски – виолина и глокеншпил, Константин Хаџи Коцев – пијано и Мартин Георгиевски – електроника.
Во просториите на „Партизанска штампа“ од 4 до 6 ноември ќе се одржи работилница на тема „Култура на демократија: како демократските вештини се рефлектираат врз креативниот процес на создавање уметнички дела“ (изработка на сито-печат колажи). Работилницата ќе ја водат Билјана Димитрова и Милош Стојановиќ од „Партизанска штампа“.
(Текстот е објавен во „Културен печат“ број 254, во печатеното издание на весникот „Слободен печат“ на 2-3.11.2024)
