По воодушевувачкиот прием на овогодинaшното доделување на Оскарите, водителот Конан О’Брајан ќе се врати како домаќин на церемонијата во 2026 година, соопштија Академијата за филмски уметности и науки и „Еј-би-си“, пренесува „Вараети“.

Најавата доаѓа од Бил Крамер, извршниот директор на Академијата и Џенет Јанг, претседателката на Академијата, кои исто така го потврдија враќањето на продуцентскиот тим – Раџ Капур и Кејти Мулан, добитници на Еми, кои ќе бидат домаќини на шоуто трета година по ред.

Користејќи го својот препознатлив хумор, О’Брајан се пошегува во изјавата: „Единствената причина зошто ќе бидам домаќин на Оскарите следната година е затоа што сакам да го слушнам Адријан Броди како го завршува својот говор“.

Патем, говорот на Броди за наградата за најдобар актер во филмот „Бруталистот“ беше најдолгиот во историјата на церемонијата.