Наместо решенија за проблемите со комуналните сметки кои граѓаните како што велат ги добиваат без никаква реална методологија за наплата со многу поголема сума, општина Тетово на чело со првиот човек Билал Касами речиси секоја недела остварува средби со граѓаните каде добиваат ветувања дека проблемот ќе се реши.

Вака е повеќе од два месеци откако словенечката компанија Саубермахер започна да го менаџира сметот во Тетово, но и да ги фактурира сите комунални сметки.

Тетовци на денешната средба со градоначаликот Касами имаа еден куп поплаки.

– Ми дојде двојно поскапа сметката, не треба да се плаќа квадратура, ѕидовите не прават смет, туку луѓето. Јас живеам сама и плаќам повеќе од некој кој живее во стан со 5 луѓе. Има некои печалбари на кои кога доаѓаат во Тетово им стигнале сметки од 9.000 денари. Се плашиме од извршители, не знаеме дали ги плаќаме сметките, но ако не ги платиш, може да ти тропне на врата извршител, рече една жителка на Тетово.

Свеченост на тетовскиот плоштад со нови контејнери и камони, Словенците го презедоа менаџирањето со сметот

– Ми стига сметка и за мене и за сопругот и плус треба да платиме канализација, а ние во малото немаме канализација, дадовме приговор, ама бадијала. Тие комунални сметки се извадени како низ ракав, додава друга жителка на Тетово.

Касами вели дека продолжува да комуницира со граѓаните со цел изнаоѓање на решенија. Но и покрај инфрмациите на дел од тетовци дека плаќаат и два пати поскапи комунални сметки со новата методолигија, тој уверува дека ниту еден жител на Тетово нема да биде оштетен.

– Денеска продолжуваме со комуникација со граѓаните во делот со решавање на проблемот со комуналните сметки. Чекор по чекор се решаваат, некои проблеми се посложени, но ние продолжуваме на неделно ниво да разговараме со граѓаните да видиме каде е проблемот. Се работи за 30.000 домаќинства. Нема да има оптоварување, нема граѓаните да бидат оштетени. Поголем е проблемот и затоа одиме на покомплексно решение. Имаме канцеларии во Палчиште и во Тетово, ако таму не им се реши проблемот тогаш може да остварат средба со нас. А претходниот систем со кој се наплатувало по член не функционирал како што треба, тогаш не ги ажирирале податоците, некој починал, некој се родил на пример, а новиот систем по метар квадратен е пореален,/ изјави градоначалникот на Општина Тетово Билал Касами.

Откако словенечката компанија го презеде менаџирањето со сметот во Тетово, а оОпштината одлучи сметките за вода, ѓубрарина и подигање и транспортирање на отпадот да го наплатуваат странците, пред ЈКП Тетово речиси секој ден има револтирани граѓани.

Пред околу два месеци со презентација на камиони за собирање на отпад и нови контејнери на градскиот плоштад во Тетово, Општината го промовираше почетокот на јавното-приватно партнерство со словенечката компанија Саубермахер, со која пред неколку месеци потпиша договор за собирање и транспортирање на комуналниот смет во Тетово.

Градоначалникот на Тетово, Касами тогаш рече дека сите вработени во ЈКП Тетово кои биле ангажирани во Секторот „Комунална хигиена“ ќе ги преземе словенечката компанија, а сметот ќе се собира во сите села и населени места во рамките на Општина Тетово.

Но состојбата е сосема друга. Тетовските комуналци се уште не земаат редовно плата, згора на се, се појавија нови проблеми, како повисоки комунални сметки кои пристигаат за штали, подруми и гаражи.