Комисијата за употреба на имињата утре ќе заседава и ќе донесе мислење дали името на бугарскиот цар Борис Трети може да се користи како назив на здружение или фондација, најави министерот за правда Кренар Лога на денешниот брифинг со новинарите. Од Централен регистар го информирале Министерството за правда дека од здружението „Цар Борис Трети“ не доставиле дополнителни документи со кои ќе се усогласи со измените на Законот за здруженијата и фондациите, со кој се забрани во називите да се користат имиња, презимиња или прекари на лица кои биле соработници на фашизмот, нацизмот, Третиот рајх итн.

– Комисијата ќе заседава утре и ќе донесе мислење за името на охридското здружение, по што јас ќе донесам соодветно решение, согласно законот. Процедурата е иста како минатиот пат – рече министерот за правда Лога.

Здружение на Бугарите од Охрид минатиот месец пред истекот на рокот за усогласување со законот, кој истече на 16 февруари, до Централниот регистар поднесе барање да се усогласи и со тоа си купи дополнително време. Надлежните од Централен регистар тогаш објаснија дека охридското здружение не поднело никакви дополнителни документи за навистина да си го смени името, туку само еден лист хартија со искажана намера за усогласување.

Потоа, кога Комисијата за употреба на имиња почна да заседава пред десетина дена и да носи мислења, од охридското здружение повторно најавиле дека ќе поднесат докумети за усогласување и со тоа повторно си купија време, па тогаш Комисијата не одлучуваше за „Цар Борис Трети“, а донесе негативно мислење за употреба на името Иван Михајлов како назив за здружението на Бугари од Битола. Врз основа на тоа негативно мислење министерот Лога донесе решение дека здружението „Иван Михајлов“ не е усогласено со Законот за здруженијата и фондациите, а потоа Центгралниот регистар по службена должност го избриша битолското здружение врз основа на решенето на министерот.

Од утре ќе се спроведе истата постапка и за здружението „Цар Борис“ од Охрид.