Комеморација за актерката Снежана Стамеска ќе се одржи во Драмски театар Скопје
Драмски театар Скопје ја информира јавноста дека комеморација во чест на починатата актерка Снежана Стамеска ќе се одржи во фоајето на Драмски театар на 12 септември, во 12 часот.
Препорачано
Стамеска беше погребана на 7 септември на Градските гробишта во Бутел пред голем број колеги, почитувачи, роднини и пријатели.
Снежана Стамеска беше првенка на Драмски театар Скопје и една од ведетите на македонското глумиште. Дипломирала на Театарската академија во Белград во 1970 година.
Од нејзиното вработување во 1971 до пензионирањето во 2010 година Стамеска беше член на ансамблот на Драмски театар Скопје. Низ исклучително плодната актерска кариера одиграла преку седумдесет улоги во матичниот театар и на сцените на неколку други македонски театарски куќи.
Таа реализираше многу значајни телевизиски и филмски улоги. Исклучителната популарност Снежана Стамеска ја стекна во осумдесетите и деведесетите години кога публиката ја засака во улогите на Пандора во „Солунски патрдии“ (1979), Вера во „Диво месо“ (1979), Сина во телевизиската серија „Трст виа Скопје“ (1987), Вера во „Среќна нова ’49“ (1985) и Паца во „Викенд на мртовци“ (1985), известија од Драмски театар Скопје.
