Колумбија објави дека планира да испрати 70 нилски коњи во светилишта во Индија и Мексико, се вели во извештајот на „Вашингтон пост“. Овие животни се потомци на четири африкански нилски коњи кои незаконски биле увезени од страна на нарко босот Пабло Ескобар во 1980-тите. Нилските коњи биле дел од колекцијата на егзотични животни како слонови, жирафи и антилопи во приватната зоолошка градина на неговиот имот во западна Колумбија. Но, откако Ескобар се предал во 1991 година, владата го зазела неговиот имот, но им дозволила на животните да шетаат слободно.

За 30 години, четирите нилски коњи се намножиле на 130 и се населиле во реката Магдалена во централна Колумбија. Владата соопшти дека животните почнале да ја загадуваат почвата и водата и да ги бришат автохтоните растенија во регионот. И локалното население се чувствувало загрозено од тревопасните животни.

Затоа, гувернерот на регионот предложил план за справување со заканата – нивно испраќање во Индија и Мексико.

„Се надеваме дека дозволите што ги бараат националните институции може да бидат одобрени во првата половина на оваа година, за да можеме да направиме аранжмани за воздушната пратка“, изјави Анибал Гавирија, гувернер на Антиокија.

Растот на популацијата на нилскиот коњ „е сложена ситуација за жителите“ во регионот, од кои некои се загрозени од животните, кои можат да тежат два до три тона, додаде тој.

Локалната агенција за животна средина забележала два напади врз жителите во 2021 година.

Во 2022 година, по неуспешните обиди за стерилизација, владата ги прогласи нилските коњи за инвазивен вид, отворајќи ја вратата за лов. Експертите и агенцијата за животна средина се согласија дека тоа е неопходно решение, со оглед на заканата за локалното население и дивиот свет.

Студијата во списанието „Нејчр“ предупреди дека бројот на нилските коњи може да порасне до 1.500 за 20 години. Властите во Колумбија користеле неколку методи за да ја контролираат нивната популација, но овие активности имале ограничен успех.