Колагенот е една од основните градбени компоненти на телото. Составен е од аминокиселини што се апсорбираат преку протеините што ги внесуваме со храна, а постојат повеќе од 20 подтипови кои се наоѓаат насекаде – од коските и мускулите, до органите, пишува „Гардијан“.

Типовите I, II и III се најзастапени во кожата, ‘рскавицата и сврзното ткиво, и имаат клучна улога во поддршката на цврстината и еластичноста на телото.

Во последните години, колагенот стана познат како протеинот кој ја одржува кожата млада, а промоторите на колаген во прав и таблети ветуваат дека овие суплементи ги забавуваат знаците на стареење, но има ли вистина во овие тврдења?

Д-р Афшин Мосахеби, професор по пластична хирургија на Универзитетскиот колеџ во Лондон, вели дека науката е „скептична“ во врска со тоа, поради недостаток на големи и рецензирани студии.

„Нема директни докази дека колагенот, земен самостојно, може да направи нешто повеќе од тоа да обезбеди доволно протеини“, вели д-р Мосахеби.

Тој потврдува дека со стареењето нивото на колаген се менува, што доведува до „нагужвана“ и помалку цврста кожа, но дека е погрешно да се претпостави дека земањето суплементи со колаген е едноставно решение.

„Кога ќе изедете нешто или ќе проголтате таблета со колаген, тоа не оди директно до вашата кожа. Секако, дел од содржината ќе се апсорбира и ќе се искористи за обновување на кожата, но не оди сè директно од устата до лицето и брчките“, додава тој.

Истакнува дека и користењето производи за нега на кожа кои содржат колаген нема да направи долгорочна разлика во процесот на стареење, бидејќи тие „не продираат длабоко во кожата“.

Д-р Мосахеби вели дека процесот на стареење најмногу зависи од генетиката (на пример, чувствителна светла кожа) и од начинот на живот.

Неговите совети за забавување на стареењето вклучуваат: урамнотежена исхрана со доволно протеини, избегнување на сонце, непушење, добра хидратација и користење на производи кои содржат состојки што го одржуваат тонусот на кожата, како што е хијалуронската киселина.