Колекционерство – Љубов која еднаш ќе се вкуси не завршува никогаш
Скоро и да нема човек кој барем еднаш во животот не правел некакви збирки. Најчесто е тоа дел од растењето, но кај колекционерите станува дел од животот без кој не би можеле да си го замислат.
Препорачано
Најчесто започнува како посебна приврзаност кон одреден предмет со посебно значење, а многу често знае да заврши како пасија и посебен вид на љубов која еднаш ќе се вкуси не завршува никогаш. Некои од колекциите ни звучат вообичаени и чести додека пак некои знаат да бидат и необични и восхитувачки.
Па сепак секој од колекционерите си има своја уникатна приказна за раскажување и секој си има своја лична причина за своето колекционерско хоби.
Бојан Георгиевски
галерист – колекционер на шишенца од парфеми
Парфемот како концепт многу го сакам. За мене е едно значајно обележје на човештвото, на цивилизацијата. Фасцинантно ми е тоа што сме успеале да направиме една таква игра со мирисот во служба на привлечноста, но не само во нејзина. Парфемите служат да нѐ доискажат, да го пополнат просторот на недоискажаното, она малку а битно што останува за нашиот карактер, за нашите желби… па и вредности, кои не ги кажува говорот, облеката, маниризмот. Она што во суштина се перципира само преку мирисот, преку носот.
Мојата привлечност кон оваа колекција е во суштина естетска, од визуелен но и тактилен аспект, така што повеќето парчиња ми се допаѓаат и со кои имам некаква емотивна поврзаност. Истата не е направена толку многу од колекционерски побуди, колку што е од желба за зачувување на спомените. За мене е интересно тоа што преку колекцијата, во која има временски распон од речиси 100 години, можам да гледам како се менувал вкусот… општиот вкус, општата естетика… но и мојот вкус.
Интересно е дека некои шишенца кои многу ми се допаѓале порано сега не ми се ништо посебно, но секако има и такви кои ги сметам за одлични вонвременски естетски остварувања. Mеѓу нив би ги издвоил, „Farouche“ од „Nina Ricci“, „Ô de Lancôme“, „Paloma Picasso“, „Moustache“ од „Rochas“, „Fabergé“, „Eau Sauvage“ од „Christian Dior“ од овој парфем повеќе ми се допаѓа старото шише иако и моменталниот дизајн кој е….. мислам од 80тите е убав… но стариот е навистина елегантен… и „Paris“ од Ives Saint Laurent исто така оригиналниот дизајн. Секако ми се допаѓаат и други, но овие ми паѓаат први на памет.
Колекцијата брои вкупно 195 шишенца.
Инаку немам омилени парфеми, не сум ни имал. Зависи од приликата, годишното време, од човекот кој го носи. Знаете вкусот се менува, тоа е убавото за него, па така немам безвременски омилени парфеми.
Ангел Ситновски
архитект – колекционер на музички винили
Соживотот со корона вирусот, освен негативни донесе и позитивни промени кај многумина. Една од тие позитивни промени е и враќањето на винилот и продажбата на Лонг плеј плочи.
Всушност винилот никогаш никаде не отиде за да би се вратил денес. Ние, љубителите или колекционерите на винили никогаш не престанавме да слушаме и купуваме плочи. Радува што денес стасаа млади генерации кои го откриваат и слушаат винилот. Винилот и грамофонот, барем мене, ми даваат една убава топлина во мојот дом.
Во тој прекрасен и над се‘ езотеричен свет влегов кон крајот на пеесеттите години од минатиот век, безмалку шест децении. Моите родители имаа некаков стар грамофон и неколку плочи и ми всадија љубов кон музиката. Имав среќа што како дете растев со раѓањето на рок музиката. Меѓу првите во градов имав еден сингл од „The Beach Boys“, и од таму дојде мојот прекар Бојс.
Кога се појавија „The Beatles“, потоа „The Rolling Stones“ дефинитивно станав колекционер на плочи. Најпрво купував синглови, за подоцна да купувам и албуми. Мои омилени групи од тоа време , покрај споменативе беа и „The Animals“, „Spencer Davis Group“, „The Yardbirds“ за полека да се префрлам на прогресивниот рок. Преку преработки на блуз стандарди во изведба на некои од моите омилени групи го засакав и блузот, а подоцна и џезот.
Кога се појави ЦД-то како медиум почнав да купувам и ЦД-а иако никогаш не се откажав од винилот. И покрај толку поминати години кои останаа позади мене и покрај сите овие турбулентни времиња не се откажав од купување на мојата музика. Имам колекција од илјадници плочи и ЦД-а. Плочите и ЦД-ата за мене имаат многу убави спомени. Многу од нив ми се потпишани од музичарите. Се уште го користам мојот стар грамофон „Pioneer PL 41D“, и „Pioneer ЅА 8800“ засилувачот , како и „Т + А“ ѕвучните кутии.
Најубаво решение за слушање е еден одмерен баланс помеѓу аналогно и дигитално; дневно слушам од 5 до 8 ЦД-а и обавезно една до две плочи. Ако ги слушам по ред, албумот што денес сум го слушал ќе дојде повторно на ред после 5 години. Имам ритуал на гледање на обвивките, внимателно ставање на плочата на грамофонот и потоа доаѓа убавината на топлиот ѕвук кога иглата ќе „заора“ низ браздите на плочата. Непроценливо!
Ако никогаш не сте слушнале ѕвук на плоча, збогатете го својот живот со едно ново искуство, најдете плоча која ќе ви се допадне и завртете ја на вашиот грамофон.
Блажо Симоновски
специјалист за развој на нови пазари – колекционер на патики
За мене колекционерство не е мода, туку искрена пасија кон патики. Секогаш купувам и бирам пар кои што мене ми се допаѓаат без разлика дали се барани во моментот или не.
Пасијата почна многу рано, ’94-та, ’95-та, но почнав да собирам активно патики од 2000 година. Пред 2000-та сите сретства одеа за даски за скејт, па не остануваше за Џорданки.
View this post on Instagram
Инспирација потекна од НБА и Мајкл Џордан, како и скејт и хип хоп културата. Меѓу првите значајни првично би ги спомнал Ер Џордан IV ‘Бред’ кои што и ден денес ми се омилени Џорданки.
За точната бројка во колекцијата не сум сигурен. Престанав да бројам, порано бројката ми значеше повеќе, сега некои од нив ги подарувам, некои ги менувам ама би требало да е околу 300 пара.
Ретко купувам нови силуети, купавам се што излегува како реиздание на стари модели, пред се Јордан од 1-6, како и ексклузивни Најк Данк СБ (Скејтбординг)
Најк СБ и Џордан преовладуваат во мојата колекција иако имам и други брендови.Овие два секогаш биле иновативни, дури и бунтовни и контраверзни на моменти, па имаме нешто заедничко. Мегу нив најдраг ми е Џордан IV Бред a најскапо платен Џордан 5 Supreme Camo.
View this post on Instagram
Од целата клекција скоро се‘ се носи иако имам доста неносени пара, но тие се пред се‘ наменски дупликати.
За крај и би порачал носете си ги патиките зошто еднаш се живее.
