Траги од различни видови дрога се најдени во ткивата на делфини во Мексиканскиот Залив, во Атлантскиот Океан, јавува „Фокс“.

Истражувачи тестирале 89 делфини во повеќе области од Заливот и откриле дека 30 од нив имаат одредено ниво дрога во своето тело, а 24 биле позитивни и на лек против болки којшто е стопати посилен од морфиумот.

Податоци за местата на кои е откриена концентрација на кокаин во организмите на делфини не се објавени. Новиот труд откри и присуство на фентанил кај овие морски цицачи. Седативот „мепробамат“ и мускулниот релаксант „карисопродол“, исто така, се најдени во масното ткиво на тестираните животни. Истражувачите велат дека тие не ги внесувале хемикалиите орално – со пиење вода, туку преку кожата.

Стручњакот за морски цицачи, Дара Орбах, рече дека фармацевтските производи и дрогата којашто оди како отпад во водите се сериозни микрозагадувачи на светско ниво.

– Нивното присуство е забележано и во слатководните екосистеми, реките и океаните на многу места низ светот. Кога се истражува загадувањето, делфините често се користат како биоиндикатори за здравјето на одреден екосистем бидејќи тие имаат маснотии богати со липиди што можат да ги складираат загадувачите што ги бараме, појасни Орбах.

Хусеин Абдула, професор по Хемија на американскиот Универзитет „Еј-eнд-ем“ во Корпус Кристи, Тексас, додаде дека овие наводи подигнуваат „црвено знаме“ за опасност.

– Резултатите од тестот се она што јас би го нарекол „црвено знаме“ – ние сме загрижени и треба дополнително да истражиме и да видиме колку е навистина голем проблем ова? Дали е ова само случај со делфините во Мексиканскиот Залив или е, всушност, веќе вообичаено во водите ширум светот?, прашува проф. Абдула.

Во јули годинава, научниците потврдија дека и ајкулите коишто живеат во водите кај Бразил имаат кокаин во ткивата.