Барселона ќе биде во потрага по нов тренер за следната сезона, откако Чави по саботниот пораз од Виљареал потврди дека ќе ја напушти клупата на крајот од сезоната.

Чави ќе замине по две и малку сезони како тренер на клубот каде што блесна како играч и освои сè во својата кариера.

Поранешниот фудбалер од средниот ред ги освои шпанскиот Суперкуп и „Ла Лига“ како тренер, иако најверојатно оваа сезона ќе ја заврши со празни раце.

Големото прашање сега е каде оди Барса од тука? И, уште поважно, кој ќе раководи со клубот следната сезона.

Медиумите веќе шпекулираат кој би можел да биде новиот тренер на Барселона следното лето. Веќе се споменуваат Рафа Маркез и Тиаго Мота, а на оваа листа се наоѓаат и имињата на Јирген Клоп и Жозе Мурињо.